ഫുൾ സ്ലീവ് ഷർട്ടും ഫോർമൽ പാന്റ്സും ധരിച്ചെത്തിയ യുവതി…കലക്ടാറാണെന്നറിയാതെ കൊച്ചിയിലെ ഓട്ടോ ഡ്രൈവർമാർ പറഞ്ഞത്

ഫുൾ സ്ലീവ് ഷർട്ടും ഫോർമൽ പാന്റ്സും ധരിച്ചെത്തിയ യുവതി…കലക്ടാറാണെന്നറിയാതെ കൊച്ചിയിലെ ഓട്ടോ ഡ്രൈവർമാർ പറഞ്ഞത്

കാക്കനാട്: ‘ഏയ് ഓട്ടോ…’ ഫുൾ സ്ലീവ് ഷർട്ടും ഫോർമൽ പാന്റ്സും ധരിച്ചെത്തിയ യുവതി വിളിച്ചപ്പോൾ അടുത്തെത്തിയ ഡ്രൈവറോട് ചോദ്യം ഒറ്റത്തന്നെ — മീറ്റർ പ്രവർത്തിക്കില്ലേ?

‘ഹോ… ഈ രാത്രി മീറ്ററിട്ട് ഓടിയാൽ എങ്ങനെ മുതലാകും’ എന്നായിരുന്നു ഡ്രൈവറുടെ മറുപടി. യുവതി പ്രതികരിക്കാതെ സംസാരിക്കുമ്പോഴേക്കും മോട്ടോർ വാഹന വകുപ്പ് ഉദ്യോഗസ്ഥർ സ്ഥലത്തെത്തി.

ഓട്ടോ വിളിച്ചത് എറണാകുളം ജില്ലാ കലക്ടർ ജി. പ്രിയങ്കയാണെന്നും ഇത് പരിശോധനയുടെ ഭാഗമാണെന്നും ഡ്രൈവറോട് ഉദ്യോഗസ്ഥർ വ്യക്തമാക്കി.

കലക്ടർ ജി. പ്രിയങ്കയുടെ നേതൃത്വത്തിൽ രാത്രി കൊച്ചി നഗരത്തിൽ നടത്തിയ പ്രത്യേക പരിശോധനയിൽ നിയമലംഘനം കണ്ടെത്തിയ 174 ഓട്ടോറിക്ഷകൾക്ക് പിഴ ചുമത്തി.

ഇതിൽ 72 ഓട്ടോറിക്ഷകളിൽ ഫെയർ മീറ്റർ പ്രവർത്തിപ്പിച്ചിരുന്നില്ല. സ്ത്രീ സൗഹൃദവും നിയമാനുസൃതവുമായ ഓട്ടോ സംസ്കാരം വളർത്തിയെടുക്കേണ്ടതിന്റെ ആവശ്യകത കലക്ടർ ഡ്രൈവർമാരെ ഓർമ്മിപ്പിച്ചു.

എൻഫോഴ്സ്മെന്റ് ആർടിഒ ബിജു ഐസക്കിന്റെ നേതൃത്വത്തിലുള്ള സംഘമാണ് പരിശോധനയ്ക്ക് നേതൃത്വം നൽകിയത്.

റെയിൽവേ സ്റ്റേഷനുകൾ, വൈറ്റില, കലൂർ, കതൃക്കടവ്, ഹൈക്കോടതി പരിസരം തുടങ്ങിയ പ്രദേശങ്ങളിലായിരുന്നു പരിശോധന. ആറ് സ്ക്വാഡുകളിലായി 365 ഓട്ടോറിക്ഷകളാണ് പരിശോധിച്ചത്.

ഇതര ജില്ലകളിൽ നിന്നെത്തി രാത്രി സമയം അനധികൃതമായി സർവീസ് നടത്തിയിരുന്ന 20 ഓട്ടോറിക്ഷകൾ പിടികൂടി. ഇവയിൽ ആലപ്പുഴ, ഇടുക്കി, കോട്ടയം ജില്ലകളിൽ നിന്നുള്ള വാഹനങ്ങളും ഉൾപ്പെടുന്നു.

ഫിറ്റ്നസ് സർട്ടിഫിക്കറ്റില്ലാത്ത 15 ഓട്ടോകളും, നികുതി അടയ്ക്കാതെ സർവീസ് നടത്തിയ 10 ഓട്ടോകളും, നമ്പർ പ്ലേറ്റില്ലാത്ത 15 ഓട്ടോകളും കണ്ടെത്തി.

കൂടാതെ, അധിക ലൈറ്റുകൾ ഘടിപ്പിച്ച് അമിത വെളിച്ചം വിതറി മറ്റ് വാഹനങ്ങൾക്ക് ബുദ്ധിമുട്ടുണ്ടാക്കിയ 12 ഓട്ടോറിക്ഷകൾക്ക് പിഴ ചുമത്തിയതോടൊപ്പം ലൈസൻസില്ലാതെ ഓടിച്ചിരുന്ന ഏഴ് ഡ്രൈവർമാരെയും പിടികൂടി.

English Summary

Ernakulam District Collector G. Priyanka led a late-night inspection drive against auto-rickshaw rule violations in Kochi. A total of 174 autos were fined, including 72 for not using fare meters. Officials checked 365 autos across major city areas and found multiple violations such as lack of fitness certificates, unpaid taxes, missing number plates, excessive lighting, and unlicensed drivers. The Collector urged drivers to promote a women-friendly and lawful auto culture.

kochi-night-auto-checking-collector-priyanka-meter-violation

Kochi auto checking, Ernakulam Collector, G Priyanka, Auto meter violation, MVD Kerala, Night inspection Kochi, Auto rickshaw rules, Kerala traffic news