കണ്ണൂർ: ഓടിക്കൊണ്ടിരുന്ന ട്രെയിനിൽ കത്തിയുമായി യാത്രക്കാരന്റെ പരാക്രമം. തിങ്കളാഴ്ച ഉച്ചയ്ക്ക് തിരുവനന്തപുരം-മംഗളൂരു ഏറനാട് എക്സ്പ്രസിൽ(16606) ആയിരുന്നു സംഭവം. ഉച്ചയ്ക്ക് 1.50-ന് മാഹിയിൽ നിന്നാണ് ഇയാൾ കയറിയതെന്ന് യാത്രക്കാർ പറഞ്ഞു.(Knife wielding passenger at Ernad Express)
ഒന്നരമണിക്കൂർ നീണ്ട പരിഭ്രാന്തിക്ക് ശേഷം മറ്റു യാത്രക്കാർ കീഴ്പ്പെടുത്തി ഇയാളെ ചെറുവത്തൂർ സ്റ്റേഷനിൽ ഇറക്കുകയായിരുന്നു. ഉച്ചത്തിൽ സംസാരിക്കുകയും അസ്വാഭാവികമായി പെരുമാറുകയും ചെയ്തു. ഇടയ്ക്ക് കത്തി വീശിക്കൊണ്ടിരുന്നതായി യാത്രക്കാർ പറഞ്ഞു.
ട്രെയിനിൽ പോലീസ് ഉണ്ടായിരുന്നില്ല. ഇതേ തുടർന്നാണ് യാത്രക്കാർ സംഘടിച്ച് ഇയാളെ 3.25-ന് ചെറുവത്തൂർ സ്റ്റേഷനിൽ ഇറക്കിയത്. തുടർന്ന് ഇയാളെ ചന്ദേര പോലീസിന് കൈമാറി. കാസർകോട് സ്വദേശിയാണ് ഇയാളെന്ന് റെയിൽവേ പോലീസ് അറിയിച്ചു.
