തിരുവനന്തപുരം: കസ്റ്റമർ കെയർ സെന്റർ നമ്പർ ലഭിക്കാനായി ഗൂഗിളിൽ തിരയരുതെന്ന മുന്നറിയിപ്പുമായി കേരള പൊലീസ്. ട്രെയിൻ ടിക്കറ്റ് റദ്ദാക്കാൻ ഗൂഗിളിൽ കണ്ട നമ്പറിൽ വിളിച്ച് പണം നഷ്ടപ്പെട്ട വാർത്ത ചൂണ്ടികാണിച്ചാണ് പൊലീസ് മുന്നറിയിപ്പ്.
കസ്റ്റമർ കെയർ സെന്റർ നമ്പർ ലഭിക്കാനായി ഒരു കാരണവശാലും ഗൂഗിളിൽ തിരയരുതെന്നും അതാത് സ്ഥാപനങ്ങളുടെ വെബ് സൈറ്റ് വിലാസം ബ്രൗസറിൽ ടൈപ്പ് ചെയ്തുമാത്രം ഔദ്യോഗിക വെബ്സൈറ്റിൽ പ്രവേശിച്ച് കസ്റ്റമർ സെന്റർ നമ്പർ കണ്ടെത്താനാണ് പൊലീസ് നിർദേശത്തിലുള്ളത്.
ഗൂഗിളിൽ തിരഞ്ഞ് വെബ്സൈറ്റ് വിലാസം കണ്ടെത്തി അതിൽ ക്ലിക്ക് ചെയ്യുന്നതും അപകടകരമാണെന്നും പൊലീസ് പറയുന്നു. ഗൂഗിളിൽ നിന്ന് ലഭിച്ച കസ്റ്റമർ കെയർ നമ്പറിൽ വിളിച്ച വ്യക്തിക്ക് 2.44 ലക്ഷം രൂപ നഷ്ടമായതിന്റെ വാർത്തയും കേരള പൊലീസ് ഫെയ്സബുക്ക് പോസ്റ്റിൽ പങ്കുവെച്ചു.
