തെരഞ്ഞെടുപ്പ് ചൂട് കഴിഞ്ഞാൽ ചൂടൻ ചായക്ക് വിലയേറും
തിരുവനന്തപുരം: സംസ്ഥാനത്ത് പാൽവില കൂട്ടാൻ സർക്കാർ തീരുമാനിച്ചു. തദ്ദേശ തിരഞ്ഞെടുപ്പിന് ശേഷമായിരിക്കും വിലവർധന പ്രാബല്യത്തിൽ വരിക, എന്ന് ക്ഷീരവകുപ്പ് മന്ത്രി ജെ. ചിഞ്ചുറാണി അറിയിച്ചു.
എത്ര രൂപ വർധിപ്പിക്കണമെന്ന് തിരഞ്ഞെടുപ്പിന് ശേഷമേ തീരുമാനിക്കൂ, വിദഗ്ധ സമിതിയുടെ ശുപാർശ ലഭിച്ചതായി മന്ത്രിയും പറഞ്ഞു. “മിൽമ ആവശ്യപ്പെട്ടാൽ സർക്കാർ പരിശോധിച്ച് അന്തിമ തീരുമാനം എടുക്കും. വില വർധന നേരിയതായിരിക്കും,” എന്നും മന്ത്രി കൂട്ടിച്ചേർത്തു.
ഉത്പാദനച്ചെലവ് വൻതോതിൽ കൂടിയതിനാലാണ് വിലവർധന അനിവാര്യമായതെന്ന് സർക്കാർ വിലയിരുത്തുന്നു. പരമാവധി അഞ്ച് രൂപ വരെ വില കൂടാൻ സാധ്യതയുണ്ട്.
2022ൽ മിൽമ നിയോഗിച്ച സമിതിയുടെ പഠനപ്രകാരം ഒരു ലിറ്റർ പാലിന്റെ ഉത്പാദനച്ചെലവ് 49 രൂപ ആണെന്ന് കണ്ടെത്തിയിരുന്നു. ഇപ്പോൾ ക്ഷീരകർഷകനു ശരാശരി 44 രൂപ മാത്രമാണ് ലഭിക്കുന്നത്.
2022 ഡിസംബറിലാണ് അവസാനമായി പാൽവില കൂട്ടിയത്. അതിനുശേഷം കാലിത്തീറ്റ, ചോളം, വൈക്കോൽ, സൈലേജ് എന്നിവയുടെ വില വർധിച്ചതോടെ ഉത്പാദനച്ചെലവും കൂടിയതായി മിൽമ വ്യക്തമാക്കുന്നു.
പാൽവില കൂട്ടുന്നതോടെ ചായ ഉൾപ്പെടെയുള്ള പല ഉൽപ്പന്നങ്ങൾക്കും വില കൂടാൻ സാധ്യതയുണ്ട്.
ചോളം അടക്കമുള്ള അസംസ്കൃത സാധനങ്ങൾ ഇതര സംസ്ഥാനങ്ങളിൽ നിന്ന്എത്തിച്ചാണ് കേരളത്തിൽ തീറ്റ ഉത്പാദിപ്പിക്കുന്നത്. വൈക്കോലും സൈലേജും തമിഴ്‌നാട്ടിൽ നിന്നു കൊണ്ടുവരണം. ഇവയ്ക്കും വില കൂടി. പാൽ വില കൂടുന്നതോടെ ചായയ്‌ക്കും വില കൂടും.
English Summary:
The Kerala government has decided to increase milk prices after the upcoming local body elections, according to Dairy Development Minister J. Chinchurani.The minister said that the exact amount of the hike will be decided post-elections, though the expert committee has already recommended a rate revision.Production costs have risen sharply, prompting the government to consider a price hike of up to ₹5 per litre.A study conducted by Milma in 2022 found that the cost of producing one litre of milk was ₹49, while farmers currently receive around ₹44 per litre.The last milk price hike was in December 2022, but the prices of cattle feed, maize, and other raw materials have increased significantly since then.The hike is also expected to affect tea and related products, which rely on milk.
