നീതി കാത്ത് 20.48 ലക്ഷം കേസുകൾ
കോട്ടയം: ഹൈക്കോടതി ഉൾപ്പെടെ സംസ്ഥാനത്തെ വിവിധ കോടതികളിൽ തീർപ്പാകാതെ കെട്ടിക്കിടക്കുന്ന കേസുകളുടെ എണ്ണം വീണ്ടും ഉയരുന്നു.
നാഷണൽ ജുഡിഷ്യൽ ഡേറ്റാ ഗ്രിഡിന്റെ കണക്കുകൾ പ്രകാരം, കഴിഞ്ഞ വർഷം ഇതേ കാലയളവിൽ 19.92 ലക്ഷം ആയിരുന്ന കേസുകളുടെ എണ്ണം ഇപ്പോൾ 20.48 ലക്ഷമായി.
ഹൈക്കോടതിയിൽ മാത്രം 2.59 ലക്ഷം കേസുകളാണ് തീർപ്പാക്കാനുള്ളത്.
ജില്ലാ, മജിസ്ട്രേട്ട്, മുൻസിഫ് കോടതികളിലായി 17.88 ലക്ഷം കേസുകളും കെട്ടിക്കിടക്കുന്നു.
കഴിഞ്ഞ വർഷം ഹൈക്കോടതിയിൽ 2.52 ലക്ഷവും കീഴ്ക്കോടതികളിൽ 17.39 ലക്ഷം കേസുകളുമായിരുന്നു.
പത്ത് വർഷത്തിലധികം പഴക്കമുള്ള 89,577 കേസുകളാണ് നിലവിലുള്ളത്. ഇതിൽ 41,364 കേസുകൾ ഹൈക്കോടതിയിലും 39,399 കേസുകൾ കീഴ്ക്കോടതികളിലുമാണ്.
കീഴ്ക്കോടതികളിൽ തീർപ്പാക്കാനുള്ളവയിൽ ഭൂരിഭാഗവും ക്രിമിനൽ കേസുകളാണ്. 12.46 ലക്ഷം ക്രിമിനൽ കേസുകളും 5.41 ലക്ഷം സിവിൽ കേസുകളും ഇപ്പോഴും നീതി കാത്ത് കിടക്കുകയാണ്.
തിരുവനന്തപുരത്ത് ഏറ്റവും കൂടുതൽ, വയനാട്ടിൽ കുറവ്
തീർപ്പാക്കാനുള്ള കേസുകളുടെ എണ്ണത്തിൽ തിരുവനന്തപുരം ജില്ലയാണ് മുന്നിൽ.
ജില്ലയിലെ വിവിധ കോടതികളിലായി 90,516 സിവിൽ കേസുകളും 2,62,298 ക്രിമിനൽ കേസുകളുമായി ആകെ 3.52 ലക്ഷം കേസുകളാണ് കെട്ടിക്കിടക്കുന്നത്.
ഏറ്റവും കുറവ് കേസുകൾ വയനാട് ജില്ലയിലാണ് — 7,054 സിവിലും 21,907 ക്രിമിനലുമായി ആകെ 28,961 കേസുകൾ.
ദിനംപ്രതി വർധിക്കുന്ന കേസുകൾ വെല്ലുവിളി
ദിവസേന പുതിയ കേസുകൾ ഫയൽ ചെയ്യപ്പെടുന്ന നിരക്ക് ഉയരുന്നതാണ് തീർപ്പാക്കൽ ശ്രമങ്ങൾക്ക് പ്രധാന വെല്ലുവിളിയാകുന്നത്.
അതേസമയം, ഓൺലൈൻ വിചാരണ ആരംഭിച്ചതും പ്രതികളെ വെർച്വലായി വിസ്തരിക്കുന്ന സംവിധാനവും കേസുകളുടെ പരിഗണനയ്ക്ക് സഹായകമാകുന്നുണ്ടെന്ന് നിയമവൃത്തങ്ങൾ പറയുന്നു.
ജില്ലാവാരിയായി തീർപ്പാക്കാനുള്ള കേസുകൾ (സിവിൽ, ക്രിമിനൽ, ആകെ):
കൊല്ലം: 44,227 | 1,34,457 | 1,78,684
ആലപ്പുഴ: 37,996 | 55,382 | 93,378
പത്തനംതിട്ട: 21,472 | 53,064 | 74,536
കോട്ടയം: 29,876 | 39,707 | 69,583
ഇടുക്കി: 12,416 | 43,106 | 55,522
എറണാകുളം: 63,554 | 2,40,958 | 3,04,512
തൃശൂർ: 81,163 | 1,22,828 | 2,03,991
പാലക്കാട്: 42,989 | 65,186 | 1,08,175
മലപ്പുറം: 31,446 | 73,955 | 1,05,401
വയനാട്: 7,054 | 21,907 | 28,961
കോഴിക്കോട്: 38,088 | 68,668 | 1,06,756
കണ്ണൂർ: 32,716 | 45,312 | 78,028
കാസർകോട്: 8,476 | 19,238 | 27,714
English Summary:
The number of pending cases in Kerala courts, including the High Court, has risen to 2.048 million, up from 1.992 million last year, according to National Judicial Data Grid figures. Over 259,000 cases are pending in the High Court alone. Criminal cases form the majority in lower courts. Thiruvananthapuram district has the highest backlog, while Wayanad has the least. Despite online hearings and virtual examinations improving efficiency, the daily rise in new cases remains a major challenge.
kerala-courts-pending-cases-increase-2026
Kerala courts, pending cases, High Court Kerala, judicial backlog, criminal cases, civil cases, National Judicial Data Grid
