കനത്ത മഴയെത്തുടർന്ന് യു.എ.ഇ.യിൽ വിവിധയിടങ്ങളിലുണ്ടായ വെള്ളക്കെട്ട് ഇറങ്ങാൻ ഇനിയും സമയമെടുക്കുമെന്ന് റിപ്പോർട്ട്. വെള്ളക്കെട്ട് ഒഴിവാക്കാൻ അധികൃതർ തീവ്ര ശ്രമം നടത്തുന്നുണ്ടെങ്കിലും കനാലുകളിൽ വെള്ളം ഉയർന്നു കിടക്കുന്നതിനാൽ വെള്ളം ഒഴുക്കിക്കളയുക അത്ര എളുപ്പമല്ല. ദിവസങ്ങൾ കഴിഞ്ഞതോടെ വെള്ളത്തിൽ പായൽ പിടിക്കുകയും ദുർഗന്ധം വമിയ്ക്കുകയും ചെയ്യുന്നുണ്ട്. സാംക്രമിക രോഗങ്ങളും ഇതിനൊപ്പം പടരുന്നതായി റിപ്പോർട്ടുണ്ട്. വൈദ്യുതി ലൈനുകൾ ഭൂമിയ്ക്ക് അടിയിലൂടെ കടന്നു പോകുന്നതിനാൽ മഴയിൽ ഒട്ടേറെയാളുകൾക്ക് ഷോക്കേറ്റിരുന്നു. തുടർന്ന് അപകടമൊഴിവാക്കാൻ വിവിധയിടങ്ങളിൽ ലൈനുകളിലെ വൈദ്യുതി ബന്ധം വിച്ഛേദിച്ചു. വെള്ളം കയറിയതിനെ തുടർന്ന് അപ്പാർട്ടുമെന്റുകളിൽ കുടുങ്ങിപ്പോയവർക്ക് സഹായവുമായി മലയാളി അസോസിയേഷനുകൾ ഉൾപ്പെടെ രംഗത്തുണ്ട്.
