ന്യൂഡൽഹി: മൊബൈൽ ഫോണുകളുടെ 15 അക്ക ഐഎംഇഐ (International Mobile Equipment Identity) നമ്പറിൽ കൃത്രിമം കാണിക്കുന്നതും തിരുത്തലുകൾ വരുത്തുന്നതും ഇനി ഗുരുതരമായ ജാമ്യമില്ലാ കുറ്റമാകും.
മൂന്ന് വർഷം തടവും 50 ലക്ഷം രൂപ വരെ പിഴയും
മൂന്നു വർഷം വരെ തടവോ, 50 ലക്ഷം രൂപ വരെ പിഴയോ, അല്ലെങ്കിൽ രണ്ടും കൂടി ലഭിക്കാവുന്ന ശിക്ഷയാണ് 2023 ലെ ടെലികോം നിയമവും 2024 ലെ ടെലികോം സൈബർ സുരക്ഷാ നിയമവും നിർദ്ദേശിക്കുന്നത്.
ടെലികോം ശൃംഖലകളുടെ സുരക്ഷ ശക്തിപ്പെടുത്താനും വ്യാജ ഉപകരണങ്ങൾ വിപണിയിൽ നിന്ന് പൂർണ്ണമായും നീക്കാനും കേന്ദ്ര സർക്കാർ കർശനമായ നിയമ നടപടികൾ കൈക്കൊണ്ടിരിക്കുകയാണ്.
ഫോണുകളുടെ പ്രത്യേക തിരിച്ചറിയൽ നമ്പരായ ഐഎംഇഐ, സുരക്ഷാ ഏജൻസികൾക്ക് പ്രതികളെ കണ്ടെത്താനും ഉപകരണങ്ങളെ ട്രാക്ക് ചെയ്യാനും അനിവാര്യമാണ്.
അതിനാൽ തന്നെ ഐഎംഇഐയിൽ കൃത്രിമം വരുത്തുന്നത് നിയമപരമായി അതീവ ഗൗരവത്തോടെയാണ് കാണപ്പെടുന്നത്.
2023 ടെലികോം നിയമം–2024 സൈബർ സുരക്ഷാ നിയമം: കർശന നടപടികൾ
2023 ലെ ടെലികോം നിയമപ്രകാരം, ഫോണുകളുടെ തിരിച്ചറിയൽ സംവിധാനങ്ങളുമായി ബന്ധപ്പെട്ട മാറ്റങ്ങൾ, ഭേദഗതികൾ, കൃത്രിമം എന്നിവ കർശനമായി നിരോധിച്ചിരിക്കുന്നു.
നിർമ്മാതാക്കൾ, ബ്രാൻഡ് ഉടമകൾ, ഇറക്കുമതിക്കാർ, ഡീലർമാർ, റീട്ടെയിൽ വിൽപ്പനക്കാർ തുടങ്ങി എല്ലാവരും നിയമം കൃത്യമായി പാലിക്കണമെന്നും ടെലികോം മന്ത്രാലയം മുന്നറിയിപ്പായി അറിയിച്ചു.
പുതിയ നിയമപ്രകാരം ഐഎംഇഐ നമ്പർ മനപ്പൂർ‌വ്വം മാറ്റുക, നീക്കം ചെയ്യുക, മായ്ച്ചുകളയുക, മറ്റൊരു ഉപകരണത്തിൽ പകർത്തുക എന്നിവയ്‌ക്കെല്ലാം കടുത്ത ശിക്ഷ ലഭിക്കും.
ഇത്തരം പ്രവൃത്തികൾ രാജ്യത്തെ ടെലികോം ശൃംഖലകളുടെ സുരക്ഷയെ ബാധിക്കുമെന്നും കുറ്റവാളികളെ കണ്ടെത്തുന്നതിൽ തടസ്സമാകുന്നുവെന്നും മന്ത്രാലയം വ്യക്തമാക്കി.
പശ്ചിമബംഗാൾ രാജ്ഭവനിൽ പരിശോധന: ഗവർണറും ടിഎംസിയും തമ്മിലുള്ള വാക്പോരിന് നടുവിൽ നാടകീയ നീക്കം
ഡിജിറ്റൽ സുരക്ഷ ഉറപ്പാക്കാനുള്ള കേന്ദ്രത്തിന്റെ നീക്കം
വ്യാജ, ക്ലോൺ ചെയ്ത, കൃത്രിമമായി മാറ്റം വരുത്തിയ ഐഎംഇഐ ഉള്ള ഉപകരണങ്ങൾ കണ്ടെത്താൻ രാജ്യവ്യാപകമായി നിരീക്ഷണ സംവിധാനങ്ങൾ ശക്തിപ്പെടുത്തുന്നുവെന്നും സർക്കാർ അറിയിച്ചു.
ഉപഭോക്താക്കൾക്കും ഇത്തരത്തിൽ കൃത്രിമം വരുത്തിയ ഫോണുകൾ വാങ്ങാതിരിക്കാൻ പ്രത്യേക ജാഗ്രത പാലിക്കണമെന്നും മുന്നറിയിപ്പുണ്ട്.
ടെലികോം വ്യവസ്ഥകൾ ശക്തിപ്പെടുത്തുന്നതിലൂടെ രാജ്യത്തിന്റെ ഡിജിറ്റൽ സുരക്ഷയും ഉപഭോക്തൃ സുരക്ഷയും ഉറപ്പാക്കുകയാണെന്നാണ് കേന്ദ്രത്തിന്റെ നിലപാട്.
English Summary
India’s telecom ministry has announced that tampering with a mobile phone’s IMEI number is now a non-bailable offense. Offenders may face up to three years in jail, a fine of up to ₹50 lakh, or both. Under the 2023 Telecom Act and the 2024 Telecom Cybersecurity Act, manipulating, deleting, or modifying an IMEI is strictly prohibited to ensure network security and prevent misuse of cloned or fake devices.
