വാഷിംഗ്ടൺ:പേടകം കുതിക്കാൻ മൂന്ന് മിനിറ്റും 51 സെക്കൻഡും മാത്രം ശേഷിക്കേയാണ് വിക്ഷേപണം മാറ്റി, സുനിതാ വില്യംസിന്റെ മൂന്നാം ബഹിരാകാശയാത്ര ഇനിയും വൈകും. നാസയുടെ ബഹിരാകാശ പേടകം ബോയിംഗ് സ്റ്റാർലൈനറിൻ്റെ വിക്ഷേപണം രണ്ടാം തവണയും മാറ്റിവച്ചു. ബഹിരാകാശത്തേക്ക് കുതിക്കാൻ തയ്യാറെടുക്കുന്നതിനിടെ അവസാന നിമിഷത്തിലാണ് സാങ്കേതിക തകരാർ കണ്ടതിനെ തുടർന്ന് മാറ്റിയത്.സ്റ്റാർലൈനറിന്റെ പ്രഥമ മനുഷ്യ ദൗത്യമാണ് മാറ്റിവച്ചിരിക്കുന്നത്. സുനിതാ വില്യംസും അമേരിക്കൻ ബഹിരാകാശ യാത്രികനായ ബുഷ് വിൽമോറുമായിരുന്നു യാത്രികർ.
ഫ്ലോറിഡയിലെ കെന്നഡി സ്പേസ് സെന്ററിലായിരുന്നു വിക്ഷേപണം നിശ്ചയിച്ചിരുന്നത്. പുതിയ വിക്ഷേപണ തീയതി പ്രഖ്യാപിച്ചിട്ടില്ല.
മെയ് ആറിനും വിക്ഷേപണം മാറ്റി വച്ചിരുന്നു. അന്നും വിക്ഷേപണത്തിന് തൊട്ടുമുൻപ് സാങ്കേതിക തകരാർ കണ്ടെത്തുകയായിരുന്നു. നേരത്തെ 2019-ൽ അന്താരാഷ്ട്ര ബഹിരാകാശ നിലയത്തിലേക്ക് ക്രൂവില്ലാതെ സ്റ്റാർലൈനർ അയക്കാനുള്ള ബോയിംഗിന്റെ ശ്രമം പരാജയപ്പെട്ടിരുന്നു. സോഫ്റ്റ്വെയർ, എഞ്ചിനീയറിംഗ് തകരാറുകളാണ് അന്നും വില്ലനായത്.
