രണ്ടിടത്തായാണ് കുവൈത്തിൽ തീപിടുത്തമുണ്ടായത്. ജാബർ അൽ അഹമ്മദ്, അൽ വഫ്ര ഏരിയകളിലാണ് കഴിഞ്ഞദിവസം തീപിടുത്തമുണ്ടായത്. ജാബർ അൽ അഹമ്മദ് ഏരിയയിലെ ഒരു കെട്ടിടത്തിൽ തീ പടർന്നു പിടിച്ചതിനെ തുടർന്ന് നാലു പേർക്ക് പരിക്കേൽക്കുകയും ചെയ്തു.
ഉടൻ തന്നെ അഗ്നിരക്ഷാ സേന സംഭവസ്ഥലത്തെത്തി രക്ഷാപ്രവർത്തനം നടത്തുകയും വീട്ടിൽ ഉണ്ടായിരുന്നവരെ സുരക്ഷിതമായി ഒഴിപ്പിക്കുകയും ചെയ്തതോടെ വൻ ദുരന്തമാണ് വഴിമാറിയത്. അൽ സൂർ, അൽ തഹ് രിർ കേന്ദ്രങ്ങളിൽ നിന്നുള്ള അഗ്നിരക്ഷാ സേനയെത്തിയാണ് തീ നിയന്ത്രണവിധേയമാക്കിയത്. പരിക്കേറ്റവരെ ഉടൻ തന്നെ ചികിത്സക്കായി ആശുപത്രികളിൽ പ്രവേശിപ്പിക്കുകയും ചെയ്തു. തീ പിടുത്തത്തിന്റെ കാരണത്തെപ്പറ്റി അധികൃതർ അന്വേഷണം നടത്തിവരികയാണ്.
അൽ വഫ്രയിൽ ഒരു ഫാമിലെ തൊഴിലാളികളുടെ താമസ സ്ഥലത്തും തീപിടുത്തമുണ്ടായി. അൽ വഫ്ര, അൽ നുവൈസീബ് എന്നിവിടങ്ങളിൽ നിന്നുള്ള അഗ്നിരക്ഷാ സേനകൾ എത്തിയാണ് തീ നിയന്ത്രണവിധേയമാക്കിയത്. സംഭവത്തിൽ ഇതുവരെ പരിക്കുകളൊന്നും റിപ്പോർട്ട് ചെയ്തിട്ടില്ല.
