താമരശ്ശേരി ചുരത്തിൽ വീണ്ടും മണ്ണിടിച്ചിൽ
കോഴിക്കോട്: താമരശേരി ചുരത്തിൽ വീണ്ടും മണ്ണിടിച്ചിൽ ഉണ്ടായതിന് തുടർന്ന് താത്കാലികമായി അടക്കാൻ തീരുമാനം. ശക്തമായ മഴയെ തുടർന്ന് മണ്ണിടിഞ്ഞ ഭാഗത്ത് നിന്ന് കല്ലും മണ്ണും വീണ്ടും ഇടിയുന്ന സാഹചര്യത്തിലാണ് അടക്കുന്നത്.
അടിവാരം ഭാഗത്തും വൈത്തിരി ഭാഗത്തും വാഹനങ്ങൾ കടത്തി വിടില്ല. മണ്ണിടിച്ചലിനെ തുടർന്ന് ഇന്നലെ രാത്രിയോടെയാണ് താമരശ്ശേരി ചുരത്തിലൂടെ ഗതാഗതം ഭാഗികമായി പുനഃസ്ഥാപിച്ചത്.
കഴിഞ്ഞ ദിവസം രാത്രിയാണ് ചുരത്തിലെ ഒമ്പതാം വളവിലെ വ്യൂ പോയന്റിന് സമീപം പാറയും മണ്ണും ഇടിഞ്ഞുവീണത്. റോഡിലേക്ക് ഇടിഞ്ഞു വീണ മണ്ണും പാറയും പൂർണമായി നീക്കിയതിനു ശേഷമാണ് ഗതാഗതം ഇന്നലെ രാത്രിയോടെ പുനഃസ്ഥാപിച്ചത്.
ഇരു ഭാഗങ്ങളിലും കുടുങ്ങിയ വാഹനങ്ങൾ കടത്തി വിട്ടതിന് ശേഷം ചുരത്തിൽ ഗതാഗത നിരോധനം തുടരുമെന്നും ദുരന്ത നിവാരണ അതോറിറ്റി ചെയർപേഴ്സൺ കൂടിയായ ജില്ലാ കലക്ടർ ഡി. ആർ മേഘശ്രീ വ്യക്തമാക്കിയിരുന്നു.
ഇന്നും കനത്തമഴ; ജാഗ്രതാ നിർദ്ദേശം ആറു ജില്ലകളിൽ
തിരുവനന്തപുരം: സംസ്ഥാനത്ത് ഇന്ന് ശക്തമായ മഴയ്ക്കുള്ള സാധ്യത തുടരുന്നതായി കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി. വടക്കൻ ജില്ലകളിലാണ് കൂടുതൽ ജാഗ്രത ആവശ്യമായ സാഹചര്യമെന്ന് അധികൃതർ വ്യക്തമാക്കി.
ശക്തമായ മഴയോടൊപ്പം ശക്തമായ കാറ്റും അനുഭവപ്പെടാനിടയുള്ളതിനാൽ, പൊതുജനങ്ങളും മത്സ്യത്തൊഴിലാളികളും അതീവ ജാഗ്രത പുലർത്തണമെന്ന നിർദേശം നൽകി.
തൃശൂർ, മലപ്പുറം, കോഴിക്കോട്, വയനാട്, കണ്ണൂർ, കാസറഗോഡ് ജില്ലകളിൽ ഇന്ന് യെല്ലോ അലർട്ട് പ്രഖ്യാപിച്ചിട്ടുണ്ട്. ഒറ്റപ്പെട്ട ശക്തമായ മഴയ്ക്കാണ് മുന്നറിയിപ്പ്.
കാലാവസ്ഥാ വകുപ്പിന്റെ മാനദണ്ഡപ്രകാരം, 24 മണിക്കൂറിനുള്ളിൽ 64.5 മില്ലിമീറ്ററിൽ നിന്ന് 115.5 മില്ലിമീറ്റർ വരെയുള്ള മഴയാണ് ശക്തമായ മഴയായി കണക്കാക്കുന്നത്.
കഴിഞ്ഞ ദിവസങ്ങളിൽ സംസ്ഥാനത്ത് ഒട്ടേറെ പ്രദേശങ്ങളിൽ വെള്ളക്കെട്ടും ചെറുകിട മണ്ണിടിച്ചിലും സംഭവിച്ചതോടെ, മുന്നറിയിപ്പ് ഗൗരവമായി കാണണമെന്നാണ് ദുരന്തനിവാരണ അതോറിറ്റിയുടെ നിർദ്ദേശം.
വടക്കൻ കേരളം കൂടുതൽ മഴ ലഭിക്കാനിടയുള്ള പ്രദേശമാണെന്ന് പ്രവചനം സൂചിപ്പിക്കുന്നു. ഇതോടെ നദീതടങ്ങളിലും മലപ്രദേശങ്ങളിലും ജലനിരപ്പ് ഉയരാനുള്ള സാധ്യത ഒഴിവാക്കാനാകില്ല.
തെക്കൻ ജില്ലകളിൽ ഇടിയോടു കൂടിയ മഴ
അതേസമയം, തെക്കൻ ജില്ലകളിൽ ഇടിയോടു കൂടിയ മഴയ്ക്കുള്ള സാധ്യതയും നിലനിൽക്കുന്നു.
ശക്തമായ മഴയ്ക്കൊപ്പം മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ കാറ്റിനും ചില അവസരങ്ങളിൽ 60 കിലോമീറ്റർ വരെ വീശുന്ന കാറ്റിനും സാധ്യതയുണ്ടെന്ന് അറിയിപ്പ് വ്യക്തമാക്കുന്നു.
കേരള – കർണാടക തീരത്തും ലക്ഷദ്വീപ് തീരത്തും മത്സ്യബന്ധനത്തിന് വിലക്കുണ്ട്. കേരള – കർണാടക തീരങ്ങളിൽ ഇന്ന് കടലിൽ പോകുന്നത് അപകടകരമാണെന്ന് കേന്ദ്ര കാലാവസ്ഥാ വകുപ്പ് അറിയിച്ചു.
കടലിൽ ഉയർന്ന തിരമാലകളും മോശം കാലാവസ്ഥയും നിലനിൽക്കുന്നതിനാൽ മത്സ്യത്തൊഴിലാളികൾ തീരത്തേക്ക് മടങ്ങിവരണമെന്ന നിർദേശം നൽകി. ലക്ഷദ്വീപ് തീരത്ത് മോശം കാലാവസ്ഥ 29-ാം തീയതി വരെയും തുടരുമെന്നാണു മുന്നറിയിപ്പ്.
കടലിൽ പോകുന്നവർക്ക് മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ കാറ്റ് വീശാനിടയുണ്ട്. ചില സമയങ്ങളിൽ ഇത് 60 കിലോമീറ്റർ വരെയും ഉയർന്നേക്കാം.
ശക്തമായ കാറ്റിനൊപ്പം തിരമാലകളുടെ ഉയരവും വർധിക്കാനിടയുള്ളതിനാൽ, കടൽപ്രദേശങ്ങളിൽ താമസിക്കുന്നവർ ജാഗ്രത പാലിക്കണമെന്ന് അധികൃതർ ആവശ്യപ്പെട്ടു.
വർഷക്കാലത്ത് ഇത്തരം മുന്നറിയിപ്പുകൾ പൊതുജനങ്ങൾ അവഗണിക്കാതിരിക്കണമെന്നും, പ്രത്യേകിച്ച് യാത്രക്കാരും കർഷകരും മത്സ്യത്തൊഴിലാളികളും ശ്രദ്ധിക്കണമെന്നുമാണ് നിർദ്ദേശം.
Summary: Heavy rain triggered another landslide at Thamarassery Churam, leading to a temporary road closure. Authorities took the decision after rocks and soil continued to slide from the affected area.
