കൊച്ചി: വീണ്ടും റെക്കോർഡ് കുതിപ്പുമായി ഇന്നത്തെ സ്വർണ വില. ഇന്ന് ഒരു പവന് 800 രൂപ കൂടി സ്വർണവില 49,440 രൂപയിലെത്തി. ഗ്രാമിന്റെ വില 100 രൂപ വര്‍ധിച്ച് 6,180 രൂപയുമായി. 48,640 രൂപയായിരുന്നു കഴിഞ്ഞ ദിവസം പവന്റെ വില. ഇതോടെ 20 ദിവസംകൊണ്ട് പവന്റെ വിലയില്‍ 3,120 രൂപയുടെ വര്‍ധനവാണുണ്ടായത്. ഒരുവര്‍ഷത്തിനിടെ 10,000 രൂപയോളമാണ് വര്‍ധിച്ചത്.
ആഗോള വിപണിയിലെ വിലവര്‍ധനവാണ് സംസ്ഥാനത്തും പ്രതിഫലിച്ചത്. യുഎസ് കേന്ദ്ര ബാങ്കായ ഫെഡറല്‍ റിസര്‍വ് 2024ല്‍ മൂന്ന് തവണയെങ്കിലും നിരക്കു കുറയ്ക്കുമെന്ന സൂചനയാണ് സ്വര്‍ണത്തിന്റെ കുതിപ്പിന് കാരണം. ഇതോടെ അന്താരാഷ്ട്ര വിപണിയില്‍ സ്‌പോട് ഗോള്‍ഡ് വില ട്രോയ് ഔണ്‍സിന് 2,200 ഡോളറിന് മുകളിലെത്തി.
രാജ്യത്തെ കമ്മോഡിറ്റി വിപണിയായ എംസിഎക്‌സില്‍ പത്ത് ഗ്രാം 24 കാരറ്റ് സ്വര്‍ണത്തിന്റെ വില 66,778 രൂപയായി ഉയര്‍ന്നു. നിരക്ക് കുറയ്ക്കല്‍ നടപടികളുമായി യുഎസ് കേന്ദ്ര ബാങ്ക് മുന്നോട്ടുപോകുകയാണെങ്കില്‍ സ്വര്‍ണവില ഇനി വർധിക്കുമെന്നാണ് വിവരം. ഏപ്രിൽ, മെയ് മാസങ്ങളിൽ നിരവധി വിവാഹങ്ങൾ നടക്കാനുള്ളതിനാൽ തന്നെ വില വർദ്ധനവ് ജനങ്ങളെ ആശങ്കയിലാക്കുന്നുണ്ട്.
