ഫ്ലോറിഡ: റോഡരികിൽ കാണപ്പെട്ട കരടിക്കൊപ്പം സെൽഫി എടുക്കുന്നത് നാട്ടുകാർ അവസാനിപ്പിക്കണമെന്ന് നിർദേശവുമായി ഫ്ലോറിഡ പോലീസ്. സാന്താ റോസ ബീച്ചിലെ ഹൈവേ 98 -ലാണ് കരടിയെ കണ്ടെത്തിയത്. ഒറ്റപ്പെട്ടുപോയ കരടി കടുത്ത സമ്മർദ്ദത്തിലും വിഷാദത്തിലും ആണെന്നും അതുകൊണ്ട് ആളുകൾ ഫോട്ടോ എടുക്കാൻ ശ്രമിക്കരുതെന്നുമാണ് പോലീസ് അറിയിച്ചത്.(Florida Cops Urge Locals To Stop Taking Selfies With “Depressed” Bear)

നാട്ടുകാർ കരടിയുടെ ചിത്രം പകർത്താൻ നടത്തുന്ന ശ്രമങ്ങൾ അതിനെ അസ്വസ്ഥപ്പെടുത്തുന്നുണ്ടെന്നും അത് കടുത്ത സമ്മർദ്ദത്തിന്റെ ലക്ഷണങ്ങൾ കാണിക്കുന്നുണ്ടെന്നുമാണ് പൊലീസ് പറയുന്നത്. അസ്വസ്ഥത കാണിക്കുന്നതിനാൽ ഇത് ആക്രമിക്കാനുള്ള സാധ്യത കൂടുതലാണെന്നും സോഷ്യൽ മീഡിയ പോസ്റ്റിൽ മുന്നറിയിപ്പ് നൽകിയിട്ടുണ്ട്. നിലവിൽ കരടി പൊലീസിന്റെ നിരീക്ഷണത്തിലാണ്.

ഒരാഴ്ചയായി സാന്താ റോസ ബീച്ചിലെ ഹൈവേയിൽ ഇത് അലഞ്ഞു തിരിയുന്നുണ്ടെങ്കിലും ഇതുവരെയും പിടികൂടാൻ ആയിട്ടില്ല. വസന്തകാലത്തും വേനൽക്കാലത്തും ഫ്ലോറിഡയുടെ വിവിധ മേഖലകളിൽ ഇത്തരത്തിൽ കറുത്ത കരടികളെ കാണുന്നത് പതിവാണ്. പലപ്പോഴും ആളുകൾ കൗതുകത്താൽ ഇവയെ പിന്തുടരുന്നതും ചിത്രങ്ങൾ എടുക്കാൻ ശ്രമിക്കുന്നതും ഒക്കെ കരടികളെ അക്രമാസക്തരാക്കാറുമുണ്ട്. അതിനാലാണ് കരടികളെ കണ്ടാൽ യാതൊരു കാരണവശാലും അതിനടുത്തേക്ക് പോകരുതെന്നും ഭക്ഷണം നൽകാനോ ചിത്രം എടുക്കാനോ ശ്രമിക്കരുത് എന്നും പോലീസ് കർശനനിർദേശം നൽകിയത്.

Read Also: സംസ്ഥാനത്ത് മഴ കുറയുന്നു; രണ്ടു ജില്ലകളിൽ മാത്രം മുന്നറിയിപ്പ്