ലണ്ടൻ: മൊബൈൽ ഫോണുകളും കമ്പ്യൂട്ടറുകളും നാളുകളായി ഹാക്കർമാരുടെ നുഴഞ്ഞു കയറ്റ കേന്ദ്രങ്ങളാണ്. എന്നാൽ ഇപ്പോൾ ഇലക്ട്രിക് കാറുകളും ഇവർ ലക്ഷ്യമിടുന്നു എന്നാണ് റിപ്പോർട്ടുകൾ.
ചൈനീസ് നിർമ്മിത ഇലക്ട്രിക് കാറുകളിൽ നിന്ന് സെൻസിറ്റീവ് ഡാറ്റ ചോർത്താൻ ബീജിംഗ് ശ്രമിക്കുമെന്ന ഭയത്താൽ , യുകെ സർക്കാരിനുവേണ്ടി പ്രവർത്തിക്കുന്ന ബ്രിട്ടീഷ് പ്രതിരോധ സ്ഥാപനങ്ങൾ ജീവനക്കാർക്ക് ചൈനീസ് നിർമ്മിത ഇലക്ട്രിക് കാറുകളുമായി ഫോണുകൾ ബന്ധിപ്പിക്കുന്നതിന് എതിരെ മുന്നറിയിപ്പ് നൽകിയിട്ടുണ്ടെന്ന് തിങ്കളാഴ്ച പ്രാദേശിക പത്രം റിപ്പോർട്ട് ചെയ്തു.
ഇലക്ട്രിക് കാറുകളിലും സുരക്ഷയിലും എന്തെങ്കിലും പ്രശ്നങ്ങളുണ്ടോ എന്ന് യു.കെ.യിൽ പഠനങ്ങൾ നടക്കുകയാണ്. വിപണിയിലെ ഏറ്റവും നൂതനമായ റോഡ് വാഹനങ്ങളായ ഇലക്ട്രിക് കാറുകൾ ഹാക്കർമാർ ചൂഷണം ചെയ്യാൻ സാധ്യതയുണ്ടെന്ന് സുരക്ഷാ വിദഗ്ധർ പറയുന്നു.,
വൈദ്യുത കാറുകളിൽ അടങ്ങിയിരിക്കുന്ന മൈക്രോഫോണുകൾ, ക്യാമറകൾ, വൈഫൈ കണക്റ്റിവിറ്റി എന്നിവ രാജ്യ രഹസ്യങ്ങൾ ചോർത്താൻ ഉപയോഗിക്കാം. ഇത്തരം സാധ്യതകളെക്കുറിച്ച് കൂടുതൽ പഠനങ്ങൾ നടക്കുകയാണ്.
