ഈസ്റ്റര് ദിനത്തിലെ ഔദ്യോഗിക അവധി പിന്വലിച്ച് മണിപ്പൂര് സംസ്ഥാന സര്ക്കാര് ഉത്തരവിറക്കിയത്തിൽ വ്യാപക പ്രതിഷേധം. ഈസ്റ്റര് ദിനം പ്രവര്ത്തി ദിനമായിരിക്കുമെന്ന് സര്ക്കാര് പുറത്തുവിട്ട ഉത്തരവില് പറയുന്നു. സർക്കാർ ഓഫിസുകൾ തുറന്നു പ്രവർത്തിക്കണമെന്ന് ഉത്തരവിട്ടത് ഗവർണർ അനസൂയ യുകെ ആണ്. സർക്കാർ ഓഫിസുകൾ, കോർപ്പറേഷനുകൾ, മണിപ്പൂർ സർക്കാരിനു കീഴിലുള്ള സൊസൈറ്റികൾ എന്നിവയെല്ലാം തുറന്നു പ്രവർത്തിക്കണമെന്നാണ് ഉത്തരവിലുള്ളത്. സാമ്പത്തിക വര്ഷത്തിന്റെ അവസാന ദിനമെന്ന കാരണം ചൂണ്ടിക്കാട്ടിയാണ് ഉത്തരവ് പുറപ്പെടുവിച്ചത്. മാര്ച്ച് 30 ശനിയാഴ്ചയും 31 ഞായറാഴ്ചയുമാണെന്നിരിക്കെ ആണ് ഉത്തരവ്. ക്രൈസ്തവ വിശ്വാസികളെ സംബന്ധിച്ച് ഏറ്റവും പ്രധാനപ്പെട്ട ദിവസമാണ് ഈസ്റ്റര്. ഗവർണറുടെ നടപടിക്കെതിരെ മണിപ്പൂരിൽ പ്രതിഷേധം കനക്കുകയാണ്.
