തേങ്ങാകൊത്തു ചേര്‍ത്ത് എണ്ണയില്‍ മൊരിച്ചെടുത്ത നെയ്യപ്പം കഴിക്കാന്‍ ആര്‍ക്കാണ് ഇഷ്ടമല്ലാത്തത്. നല്ല പഞ്ഞി പോലെ മൃദുവെങ്കില്‍ പറയുകയും വേണ്ട. കുട്ടികള്‍ സ്‌കൂള്‍ വിട്ട് വരുമ്പോള്‍ നാലുമണി പലഹാരമായും കൊടുക്കാം. ഞൊടിയിടയില്‍ ഇന്‍സ്റ്റന്റ് നെയ്യപ്പം വീട്ടില്‍ തന്നെ തയാറാക്കാവുന്നതാണ്. ബേക്കിങ് സോഡയോ യീസ്റ്റോ ചേര്‍ക്കേണ്ട. മാവ് അരച്ച് പൊങ്ങാനും വയ്ക്കാതെ ഉടനെ തന്നെ നല്ല സോഫ്റ്റ് നെയ്യപ്പം ചുട്ടെടുക്കാം. ഇനി ഇങ്ങനെ ചെയ്യാം.
പച്ചരി കഴുകി വൃത്തിയാക്കിയത് 2 മണിക്കൂര്‍ വെള്ളത്തില്‍ കുതിര്‍ത്തെടുക്കാം. വെള്ളം ഊറ്റിയ അരിയിലേക്ക് പച്ചരി എത്രയാണോ എടുത്തത് അതേ അളവില്‍ ചോറും ചേര്‍ക്കണം. കൂടാതെ അഞ്ച് ഏലക്കായയും കാല്‍ ടീസ്പൂണ്‍ ഉപ്പും ചേര്‍ക്കാം. പിന്നീട് 1 കപ്പ് ശര്‍ക്കരയിലേക്ക് കാല്‍ കപ്പ് വെള്ളം ചേര്‍ത്ത് ഉരുക്കിയെടുക്കണം. ശര്‍ക്കര പാനി തണുത്തതിനു ശേഷം മിക്‌സിയുടെ ജാറിലേക്ക് അരിയുടെ മിശ്രതിവും ശര്‍ക്കര പാനിയും ചേര്‍ത്ത് നന്നായി അരയ്ക്കണം.
അരച്ചെടുത്ത മാവിലേക്ക് 1 ടീസ്പൂണ്‍ നെയ്യും അതേ അളവില്‍ എള്ളും തേങ്ങാകൊത്തും ചേര്‍ത്ത് നന്നായി യോജിപ്പിക്കണം. ശേഷം ചീനച്ചട്ടിയില്‍ വെളിച്ചെണ്ണ ഒഴിച്ച് ചൂടാകുമ്പോള്‍ തവി കൊണ്ട് മാവ് കോരി ഒഴിക്കാം. തിരിച്ചു മറച്ചും ഇട്ട് വേവിക്കണം. നല്ല മയമുള്ള നെയ്യപ്പം റെഡി. മാവ് അരച്ചുടന്‍ തന്നെ ഉണ്ടാക്കാവുന്നതാണ്. ബേക്കിങ് സോഡയും മൈദയും ഒന്നും ചേര്‍ക്കേണ്ടതില്ല.
