ഷാർജ ഷെയ്ക്കും, മാംഗോ ഷെയ്ക്കും ചിക്കുവും സ്ഥിരമായി കഴിക്കുന്നവരാണോ? പണി പിന്നാലെ വരും
ജ്യൂസുകളും ഷേക്കുകളും മധുരരുചിയാൽ നാവിനെ സന്തോഷിപ്പിക്കുന്നവയാണെങ്കിലും, അവയെ സ്ഥിരമായി ഉപയോഗിക്കുന്നത് എല്ലായ്പ്പോഴും ആരോഗ്യത്തിന് ഗുണകരമാവണമെന്നില്ല.
പഴങ്ങൾ നേരിട്ട് കഴിക്കുമ്പോൾ ലഭിക്കുന്ന പോഷകമൂല്യത്തിന്റെ ചെറിയൊരു ഭാഗം മാത്രമേ ജ്യൂസുകളിലൂടെ ലഭിക്കുകയുള്ളൂ എന്നാണ് ആരോഗ്യവിദഗ്ധരുടെ അഭിപ്രായം.
അതേസമയം, ഷാർജ ഷേക്ക്, മാംഗോ ഷേക്ക് തുടങ്ങിയ പാൽ–പഴ സംയോജനങ്ങൾ ആയുർവേദത്തിന്റെ കാഴ്ചപ്പാടിൽ ‘വിരുദ്ധാഹാരം’ ആണെന്ന് ഡോ. ഷാബു പട്ടാമ്പി വ്യക്തമാക്കുന്നു. ഇതുസംബന്ധിച്ച വിശദമായ കുറിപ്പ് അദ്ദേഹം ഫെയ്സ്ബുക്കിലൂടെ പങ്കുവെച്ചിട്ടുണ്ട്.
പാൽ, പഴങ്ങൾ, മത്സ്യമാംസം എന്നിവ ചേർത്ത് കഴിക്കുന്നത് ആയുർവേദപ്രകാരം ശരിയായ ഭക്ഷണക്രമമല്ലെന്നും, ഇത്തരം തെറ്റായ സംയോജനങ്ങൾ ദഹനപ്രശ്നങ്ങൾക്കും ദീർഘകാല ആരോഗ്യബാധകൾക്കും കാരണമാകാമെന്നും ഡോക്ടർ പറയുന്നു.
ഫ്രിഡ്ജിൽ നിന്നെടുത്ത തണുത്ത പാൽ നേരിട്ട് കുടിക്കുന്നത് ദഹനശക്തിയെ ബാധിക്കുമെന്നും, ഒരു നുള്ള് മഞ്ഞളോ ഏലയ്ക്കയോ ചേർത്ത് തിളപ്പിച്ച ശേഷം മാത്രമേ പാൽ ഉപയോഗിക്കാവൂ എന്നും കുറിപ്പിൽ നിർദേശിക്കുന്നു.
പാലും പുളിയുള്ള പഴങ്ങളും ഒരുമിച്ച് കഴിക്കുന്നത് ഒഴിവാക്കണമെന്നും ഡോക്ടർ മുന്നറിയിപ്പ് നൽകുന്നു.
ഷാർജ ഷേക്ക്, മാംഗോ ഷേക്ക്, ചിക്കു ഷേക്ക് തുടങ്ങിയവ രുചികരമായ ഓർമ്മകളായതിനാൽ ആളുകൾ അവയെ എളുപ്പത്തിൽ അവഗണിച്ചുപോകുകയാണെന്നും,
എന്നാൽ ഇത്തരം ഭക്ഷണങ്ങൾ സ്ഥിരശീലമാകുമ്പോഴാണ് രോഗങ്ങൾക്ക് വഴിയൊരുങ്ങുന്നതെന്നും അദ്ദേഹം ചൂണ്ടിക്കാട്ടുന്നു.
ദഹനശേഷി കുറവുള്ളവർക്കും, കഫക്കെട്ട്, സൈനസൈറ്റിസ്, ത്വക്ക് രോഗങ്ങൾ തുടങ്ങിയ പ്രശ്നങ്ങളുള്ളവർക്കും ഇത്തരം വിരുദ്ധാഹാരങ്ങൾ കൂടുതൽ ബുദ്ധിമുട്ടുകൾ സൃഷ്ടിക്കാമെന്നും കുറിപ്പിൽ പറയുന്നു.
അതേസമയം, നല്ല വ്യായാമശീലവും ദഹനശക്തിയും ഉള്ളവർക്ക് ഇടയ്ക്ക് ഇത്തരം ഭക്ഷണങ്ങൾ കഴിക്കുന്നത് വലിയ പ്രശ്നമാകില്ലെന്നും ഡോ. ഷാബു പട്ടാമ്പി വ്യക്തമാക്കുന്നു.
ആകെച്ചേർത്താൽ, ഭക്ഷണങ്ങൾ ശരിയായ രീതിയിൽ ചേർത്ത് കഴിക്കുന്നതാണ് ആരോഗ്യജീവിതത്തിന് ഏറ്റവും പ്രധാനമെന്ന സന്ദേശമാണ് ഡോക്ടറുടെ കുറിപ്പിലൂടെ മുന്നോട്ടുവയ്ക്കുന്നത്.
English Summary
Ayurveda expert Dr. Shabu Pattambi has warned that popular milk-based fruit shakes such as Sharjah shake, mango shake and chikoo shake are considered incompatible food combinations. In a Facebook post, he explains that mixing milk with fruits, fish or meat can disturb digestion and may lead to long-term health problems. He also advises against drinking cold milk directly from the fridge and suggests boiling milk with turmeric or cardamom. According to him, avoiding wrong food combinations is essential for maintaining good health.
ayurveda-warning-against-milk-fruit-shakes-viruddha-aharam
Ayurveda, Dr Shabu Pattambi, Sharjah shake, mango shake, chikoo shake, milk and fruit combination, viruddha aharam, health tips, digestion problems, food combination advice
