ഇവനെ കണ്ടിട്ടുണ്ടോ? ഇവനാണ് ലോകത്തിലെ ആദ്യ പക്ഷി

ഇവനെ കണ്ടിട്ടുണ്ടോ? ഇവനാണ് ലോകത്തിലെ ആദ്യ പക്ഷി

രാവിലെ ആകാശത്ത് ചിറകടിച്ച് പറക്കുന്ന പക്ഷികളെ കാണുമ്പോൾ — ഇവയുടെ തുടക്കം എവിടെയാണ് എന്ന് ചിന്തിച്ചിട്ടുണ്ടോ?

ആ ചോദ്യത്തിന് ഉത്തരമന്വേഷിച്ച് ശാസ്ത്രലോകം കോടിക്കണക്കിന് വർഷങ്ങൾ പിന്നോട്ടു പോയപ്പോൾ ചരിത്രത്തിന്റെ പൊടിപടലങ്ങളിൽ നിന്ന് പുറത്തുവന്ന അത്ഭുതജീവിയാണ് ആർക്കയോപ്റ്ററിക്സ്.

പക്ഷികളുടെയും ഉരഗങ്ങളുടെയും സവിശേഷതകൾ ഒരുമിച്ചുള്ള ഈ അപൂർവ ജീവിയെ ലോകത്തിലെ ആദ്യ പക്ഷിയെന്ന നിലയിലാണ് ശാസ്ത്രലോകം വിശേഷിപ്പിക്കുന്നത്.

ഏകദേശം 15 കോടി വർഷങ്ങൾക്ക് മുമ്പ് ജൂറാസിക് കാലഘട്ടത്തിൽ ജീവിച്ചിരുന്നുവെന്നാണ് വിലയിരുത്തൽ. പക്ഷികളുടെ ഉദ്ഭവത്തെക്കുറിച്ചുള്ള അനിശ്ചിതത്വങ്ങൾക്ക് വ്യക്തമായ രൂപം നൽകിയതും ഇതിന്റെ ഫോസിൽ കണ്ടെത്തലുകളാണ്.

ചിറകുകളിലും വാലിലും തൂവലുകൾ ഉണ്ടായിരുന്നെങ്കിലും പല്ലുകളുള്ള താടി, നീളം കൂടിയ അസ്ഥിവാൽ, മൂർച്ചയുള്ള നഖങ്ങൾ തുടങ്ങിയവ ഇതിന് ദിനോസർ സ്വഭാവവും നൽകിയിരുന്നു.

ഈ ഇരട്ട സവിശേഷതകളാണ് ആർക്കയോപ്റ്ററിക്സിനെ “പരിവർത്തന ഫോസിൽ” എന്ന നിലയിൽ ശാസ്ത്രചരിത്രത്തിൽ പ്രധാനമാക്കിയത്.

1860-ൽ ജർമനിയിലാണ് ഇതിന്റെ ആദ്യ ഫോസിൽ കണ്ടെത്തിയത്. ആദ്യം “ഊർവോഗെൽ” (ആദ്യ പക്ഷി) എന്നായിരുന്നു പേര്. പിന്നീട് ശാസ്ത്രജ്ഞർ ആർക്കയോപ്റ്ററിക്സ് എന്ന പേര് നൽകി.

ദിനോസറുകളും ആധുനിക പക്ഷികളും തമ്മിലുള്ള പരിണാമബന്ധത്തിന്റെ തെളിവായി ഇതിനെ കണക്കാക്കുന്നു. പറവേസ് വിഭാഗത്തിലുള്ള ദിനോസറുകളിൽ നിന്നാണ് പക്ഷികൾ രൂപപ്പെട്ടതെന്ന സിദ്ധാന്തത്തിന് ശക്തി നൽകിയതും ഈ കണ്ടെത്തലാണ്.

കാക്കയുടെ വലുപ്പവും ഏകദേശം ഒരു കിലോ ഭാരവുമായിരുന്നു ഈ ജീവിക്ക്. വീതിയേറിയ ചിറകുകളും തൂവലുകളുള്ള വാലും വായുവിലൂടെ നീങ്ങാൻ അനുയോജ്യമായിരുന്നു.

ഇവ യഥാർത്ഥത്തിൽ ചിറകടിച്ച് പറന്നിരുന്നോ, അല്ലെങ്കിൽ ചിറകുവിടർത്തി തെന്നിമാറിയിരുന്നോ എന്നത് ഇപ്പോഴും ഗവേഷണ വിഷയമാണ്.

ഷിക്കാഗോയിലെ ഒരു മ്യൂസിയത്തിൽ സൂക്ഷിച്ചിരിക്കുന്ന ഫോസിൽ 2022-ൽ സി.ടി. സ്കാൻ ഉപയോഗിച്ച് പരിശോധിച്ചപ്പോൾ, ഭക്ഷണം വിഴുങ്ങാൻ സഹായിക്കുന്ന “ഓറൽ പാപ്പില്ലെ” പോലുള്ള ഘടനകൾ ഉണ്ടായിരുന്നുവെന്ന് ശാസ്ത്രജ്ഞർ കണ്ടെത്തി.

ഇന്നത്തെ പക്ഷികളിൽ കാണുന്ന ചില സവിശേഷതകൾ അന്നേ ഇവയിൽ ഉണ്ടായിരുന്നുവെന്ന് പഠനങ്ങൾ സൂചിപ്പിക്കുന്നു.

അതേസമയം, ആർക്കയോപ്റ്ററിക്സാണ് ആദ്യ പക്ഷിയെന്ന വിലയിരുത്തലിനെ ചോദ്യം ചെയ്യുന്ന ശാസ്ത്രജ്ഞരും ഉണ്ട്. 2008-ൽ കണ്ടെത്തിയ ചില ദിനോസർ വിഭാഗങ്ങൾ ആദ്യ പക്ഷികളാകാമെന്ന വാദവും നിലനിൽക്കുന്നു.

എന്നിരുന്നാലും നിലവിൽ ലഭ്യമായ തെളിവുകൾ പ്രകാരം ലോകത്തിലെ ആദ്യ പക്ഷിയെന്ന സ്ഥാനം ആർക്കയോപ്റ്ററിക്സിനാണ്.

ലോകത്തിലെ വിവിധ മ്യൂസിയങ്ങളിൽ സൂക്ഷിച്ചിരിക്കുന്ന ഇതിന്റെ ഫോസിലുകൾ ഭൂമിയിലെ ജീവപരിണാമ ചരിത്രത്തിന്റെ നിശ്ശബ്ദ സാക്ഷികളാണ്. കോടിക്കണക്കിന് വർഷങ്ങൾ പിന്നിട്ടിട്ടും മനുഷ്യനെ അത്ഭുതപ്പെടുത്തുന്ന ഒരു ജീവചരിത്രം — അതാണ് ആർക്കയോപ്റ്ററിക്സ്.

English Summary

Archaeopteryx, a 150-million-year-old creature from the Jurassic period, is widely regarded as the earliest known bird and a key transitional fossil linking dinosaurs and modern birds. It had feathers and wings like birds but also teeth, claws, and a long bony tail like reptiles. Fossil discoveries since 1860 have helped scientists understand bird evolution. Advanced scans of a Chicago specimen revealed structures aiding swallowing, similar to modern birds. Although some scientists debate whether it was truly the first bird, current evidence still considers Archaeopteryx a crucial evolutionary link.

archaeopteryx-first-bird-evolution-fossil

Archaeopteryx, Evolution, First Bird, Dinosaur Evolution, Fossils, Science, Prehistoric Life, Jurassic Period