പാഞ്ഞത്തിയ ബസ് ഇടിച്ച് ബൈക്ക് മറ്റൊരു ബസിനടിയിലേക്ക്; അപകടം സ്റ്റോപ്പിൽ നിർത്തിയിട്ടിരുന്ന ബസിനെ മറികടക്കുന്നതിനിടെ; അപകടത്തിൽപ്പെട്ടത് കാക്കനാട് സ്വദേശി ഹരി

കൊച്ചി: അങ്കമാലി എം സി റോഡിൽ സ്വകാര്യ ബസുകൾ തമ്മിലുളള മത്സരയോട്ടത്തിനിടയിൽ അപകടം. വേങ്ങൂരിൽ ബൈക്ക് യാത്രക്കാരനെ ഇടിച്ച് മറ്റൊരു ബസിന് അടിയിലേക്ക് ഇട്ടു. എറണാകുളം കാക്കനാട് സ്വദേശി ഹരിയാണ് അപകടത്തിൽപ്പെട്ടത്. പരിക്കേറ്റ ഇയാളെ ആശുപത്രയിൽ പ്രവേശിപ്പിച്ചു. യാത്രക്കാരനെ ലിറ്റിൽ ഫ്ലവർ ആശുപത്രിയിൽ പ്രവേശിപ്പിച്ചു. ഇടിയുടെ ആഘാതത്തിൽ ബൈക്ക് മറ്റൊരു ബസിന്റെ അടിയിലേക്ക് കയറി. ബൈക്കിലിടിച്ച ബസ് മറ്റൊരു കാറിലും ഇടിച്ചാണു നിന്നത്. ഇന്നു രാവിലെ 11.45 നാണ് അപകടം.
അങ്കമാലി-പെരുമ്പാവൂർ റൂട്ടിലോടുന്ന ലിറ്റിൽ ഫ്ലവർ ബസ് യാത്രക്കാരെ കയറ്റുന്നതിനായി സ്‌റ്റോപ്പിൽ നിർത്തുകയായിരുന്നു. പിന്നാലെ അതിവേഗത്തിലെത്തിയ അങ്കമാലി- മുളങ്കുഴി ജീസസ് ബസ് മുന്നിലുണ്ടായിരുന്ന ബൈക്കിലും കാറിലും ഇടിച്ചു. ഇടിയുടെ ആഘാതത്തിൽ ബൈക്ക് മുൻപിലുണ്ടായിരുന്ന ബസിന് അടിയിലേക്ക് ഇടിച്ചുകയറുകയും യാത്രക്കാരൻ തെറിച്ചുവീഴുകയും ചെയ്തു. സ്റ്റോപ്പിൽ നിർത്തിയിട്ടിരുന്ന ബസിനെ മറികടക്കുന്നതിനിടെയാണു ബസ് ബൈക്കിലും മുന്നിലുണ്ടായിരുന്ന കാറിലും ഇടിച്ചത്. നാലു വാഹനങ്ങളും അങ്കമാലിയിൽ നിന്നു കാലടിയിലേക്കു പോകുകയായിരുന്നു.