തൃശൂര്: യുവാവ് വലിച്ചെറിഞ്ഞ മാലിന്യം വീട്ടിലെത്തിച്ച് നല്കി മാതൃകയായി കുന്നംകുളം നഗരസഭ.
കുന്നംകുളം നഗരസഭയുടെ പട്ടാമ്പി മെയിന് റോഡില് മൃഗാശുപത്രിക്ക് സമീപം ഐ.ടി.ഐ. ഉദ്യോഗസ്ഥനായ യുവാവ് വലിച്ചെറിഞ്ഞ മാലിന്യമാണ് നഗരസഭ ആരോഗ്യവിഭാഗം ഉദ്യോഗസ്ഥര് തിരിച്ച് വീട്ടിലെത്തിച്ച് നല്കിയ ശേഷം പിഴ ഈടാക്കിയത്.
ശുചീകരണ പ്രവര്ത്തനം നടത്തുന്നതിനിടെ ശുചീകരണ വിഭാഗം ജീവനക്കാരനായ പ്രസാദിനാണ് റോഡരികില്നിന്ന് പ്രത്യേക പെട്ടിയിലാക്കിയ മാലിന്യം ലഭിച്ചത്.
ആരോഗ്യ വിഭാഗത്തെ വിവരം അറിയിച്ചതിനെ തുടര്ന്ന് പൊതുജനാരോഗ്യ പരിസ്ഥിതി പരിപാലന വിഭാഗം ക്ലീന് സിറ്റി മാനേജര് ആറ്റ്ലി പി. ജോണ്, പബ്ലിക് ഹെല്ത്ത് ഇന്സ്പെക്ടര്മാരായ എം.എസ്. ഷീബ, പി.പി. വിഷ്ണു എന്നിവര് സ്ഥലത്തെത്തി പരിശോധന നടത്തുകയായിരുന്നു.
ഭക്ഷണ ശീതളപാനീയ അവശിഷ്ടങ്ങളാണ് ഭംഗിയായി പൊതിഞ്ഞ് പാക്ക് ചെയ്ത് റോഡില് തള്ളിയത്.
മാലിന്യത്തില്നിന്ന് ലഭിച്ച മേല്വിലാസം ഉള്പ്പെടെയുള്ള തെളിവുകളുടെ അടിസ്ഥാനത്തില് മാലിന്യം നിക്ഷേപിച്ച ആളെ ഫോണില് ബന്ധപ്പെട്ടു. കൊറിയര് ഉണ്ടന്ന് പറഞ്ഞാണ് നഗരസഭ ആരോഗ്യ വിഭാഗം വ്യക്തിയെ ബന്ധപ്പെട്ടത്.
ലൊക്കേഷന് അയച്ചു തന്നതിന്റെ അടിസ്ഥാനത്തില് ആരോഗ്യ വിഭാഗം ഉദ്യോഗസ്ഥര് വ്യക്തിയുടെ വീട് കണ്ടെത്തുകയായിരുന്നു.
വീട്ടിലെത്തിയപ്പോള് അല്സേഷ്യന് നായയാണ് ഉദ്യോഗസ്ഥരെ ആദ്യം വരവേറ്റത്. പിന്നീട് പ്രായമുള്ള സ്ത്രീ ഇറങ്ങിവന്ന് നായയെ കൂട്ടിലാക്കി.
കൊറിയര് ഉണ്ടെന്ന് പറഞ്ഞ് ഉദ്യോഗസ്ഥര് ചെറുമകനെ വിളിച്ചുവരുത്തുകയായിരുന്നു. നഗരസഭ ഉദ്യോഗസ്ഥര് സ്നേഹപൂര്വം യുവാവ് റോഡില് വലിച്ചെറിഞ്ഞ മാലിന്യ പാക്കറ്റ് തിരികെ നല്കിയപ്പോഴാണ് യുവാവിന് കാര്യം പിടികിട്ടിയത്.
നോട്ടീസ് നല്കിയതോടെ പലതരം ന്യായവാദങ്ങളും പറഞ്ഞ് രക്ഷപ്പെടാനാണ് യുവാവ് ശ്രമിച്ചത്. പിന്നീട് 5000 രൂപ പിഴ ഈടാക്കിയപ്പോഴാണ് മാലിന്യം വലിച്ചെറിഞ്ഞാല് ഇങ്ങനെയും പണി കിട്ടുമെന്ന് ഇയാൾക്ക് മനസിലായത്.
