തിരുവനന്തപുരം: കഴിഞ്ഞ ഓണക്കാലത്താണ് മാവേലി സ്റ്റോറുകളില് അവസാനമായി പഞ്ചസാര എത്തിയത്. പഞ്ചസാര വാങ്ങാന് മാവേലി സ്റ്റോറുകളിലെത്തുന്നവര് എട്ടുമാസമായി നിരാശരായി മടങ്ങുകയാണ്. സബ്സിഡി സാധനങ്ങളുടെ വില വര്ധിപ്പിച്ചെങ്കിലും പഞ്ചസാരയും തുവരപ്പരിപ്പും വില്പ്പനയ്ക്ക് എത്തിക്കാന് സപ്ലൈകോയ്ക്ക് കഴിഞ്ഞിട്ടില്ല. കുടിശ്ശിക മുടങ്ങിയതോടെ വിതരണക്കാര് സപ്ലൈകോയ്ക്ക് പഞ്ചസാര നല്കുന്നില്ലെന്നതാണ് പ്രതിസന്ധിക്ക് കാരണം. 200 കോടി രൂപ അടിയന്തരമായി ലഭിക്കാതെ പ്രശ്നം പരിഹരിക്കാനാകില്ല എന്നാണ് പഞ്ചസാര പ്രശ്നത്തില് ഭക്ഷ്യവകുപ്പിന്റെ നിലപാട്. അനുവദിക്കാന് ഖജനാവില് പണമില്ലെന്ന് ധനവകുപ്പും വിശദീകരിക്കുന്നു. പഞ്ചസാരയ്ക്ക് ഒപ്പം തുവരപ്പരിപ്പും സപ്ലൈകോയില് സ്റ്റോക്കെത്തിയിട്ട് മാസങ്ങളേറെയായി.
നേരത്തെ 22 രൂപയായിരുന്ന പഞ്ചസാര വില ഫെബ്രുവരിയില് 27 രൂപയാക്കി വര്ധിപ്പിച്ചെങ്കിലും സ്റ്റോക്ക് എത്തിക്കാന് സപ്ലൈകോയ്ക്ക് ഇതുവരെ കഴിഞ്ഞിട്ടില്ല. 40 മുതല് 45 രൂപ വരെയാണ് പഞ്ചസാരയുടെ വിപണി വില. സബ്സിഡി സാധനങ്ങളില് ഏറ്റവും ആവശ്യക്കാരുള്ള ഇനം പഞ്ചസാരയാണ്. പഞ്ചസാര കിട്ടാതായതോടെ മാവേലി സ്റ്റോറുകളിലേക്കെത്തുന്ന ആളുകളുടെ എണ്ണം കുറഞ്ഞെന്ന് സപ്ലൈകോ ജീവനക്കാര് തന്നെ സമ്മതിക്കുന്നു.
