‘സ്ത്രീകൾക്ക് സൗജന്യ യാത്രയാണെങ്കിൽ പുരുഷന്മാർക്കും വേണം’; കെഎസ്ആർടിസി ഫ്രീ യാത്ര പ്രഖ്യാപനത്തിൽ രാഹുല് ഈശ്വർ
കൊച്ചി: കേരളത്തിൽ കെഎസ്ആർടിസി ബസുകളിൽ സ്ത്രീകൾക്ക് സൗജന്യ യാത്ര അനുവദിക്കുന്നുവെങ്കിൽ പുരുഷന്മാർക്കും അതേ ആനുകൂല്യം നൽകണം എന്ന് രാഷ്ട്രീയ നിരീക്ഷകൻ രാഹുല് ഈശ്വർ. യാത്ര എല്ലാവരുടെയും അവകാശമാണെന്നും പുരുഷന്മാരെ മാറ്റിനിർത്തുന്നത് ശരിയല്ലെന്നും അദ്ദേഹം പറഞ്ഞു.
കോൺഗ്രസ് അധികാരത്തിലെത്തിയാൽ കേരളത്തിൽ സ്ത്രീകൾക്ക് കെഎസ്ആർടിസി ബസുകളിൽ സൗജന്യ യാത്ര അനുവദിക്കുമെന്ന രാഹുല് ഗാന്ധിയുടെ പ്രഖ്യാപനത്തെ തുടർന്നാണ് രാഹുല് ഈശ്വർ പ്രതികരിച്ചത്.
“കാശുള്ള സ്ത്രീകൾക്ക് സൗജന്യമായി യാത്ര ചെയ്യാം. എന്നാൽ കാശില്ലാത്ത ഒരു പുരുഷൻ അവിടെ പോലും പെട്ടുപോകുന്ന സാഹചര്യമുണ്ടാകും. അതാണ് ഇത്തരം തീരുമാനങ്ങളുടെ അപകടം,” എന്നും അദ്ദേഹം പറഞ്ഞു.
കേരളം പോലുള്ള ഒരു സംസ്ഥാനത്ത് ഇത്തരമൊരു പദ്ധതി എത്രത്തോളം ആവശ്യമാണ് എന്നത് വലിയ ചോദ്യമാണെന്നും രാഹുല് ഈശ്വർ അഭിപ്രായപ്പെട്ടു. സ്ത്രീകൾക്ക് ആനുകൂല്യം പ്രഖ്യാപിക്കുമ്പോൾ മാധ്യമങ്ങളും സമൂഹവും കൈയടിക്കാറുണ്ടെങ്കിലും അത് മൂലം ബുദ്ധിമുട്ടുന്ന പുരുഷന്മാരുടെ അവസ്ഥ പലപ്പോഴും ശ്രദ്ധിക്കപ്പെടാറില്ല എന്നും അദ്ദേഹം പറഞ്ഞു.
വരുമാനത്തെ അടിസ്ഥാനമാക്കണം
സൗജന്യ യാത്ര നൽകേണ്ടത് ലിംഗത്തെ അടിസ്ഥാനമാക്കിയല്ല, സാമ്പത്തിക അവസ്ഥയെ അടിസ്ഥാനമാക്കിയാവണം എന്നും രാഹുല് ഈശ്വർ വ്യക്തമാക്കി.
“മാസം 20,000 രൂപ വരുമാനമുള്ള ഒരു സ്ത്രീക്ക് സൗജന്യ യാത്ര ലഭിക്കാം. എന്നാൽ 10,000 രൂപ വരുമാനം മാത്രമുള്ള ഒരു പുരുഷന് അതിന് അർഹതയില്ലെന്ന അവസ്ഥ ഉണ്ടാകാം,” എന്നും അദ്ദേഹം ചൂണ്ടിക്കാട്ടി.
സാമ്പത്തിക ബാധ്യത
സൗജന്യ പദ്ധതികൾ ദീർഘകാലത്തിൽ സംസ്ഥാനത്തിന്റെ സാമ്പത്തികാവസ്ഥയെ ബാധിക്കാമെന്നും രാഹുല് ഈശ്വർ മുന്നറിയിപ്പ് നൽകി.
“ബസിന് ഇന്ധനം വേണം, പരിപാലനച്ചെലവ് വേണം, ഡ്രൈവർ-കണ്ടക്ടർമാർക്ക് ശമ്പളവും നൽകണം. അതിനാൽ ആനുകൂല്യങ്ങൾ നൽകുമ്പോൾ സമ്പദ്ഘടനയും ചെലവും പരിഗണിക്കണം,” എന്നും അദ്ദേഹം പറഞ്ഞു.
സൗജന്യ യാത്ര നൽകേണ്ടതാണെങ്കിൽ എല്ലാവർക്കും നൽകുകയോ അല്ലെങ്കിൽ സാമ്പത്തികമായി ബുദ്ധിമുട്ടുന്നവർക്ക് പ്രത്യേക ഫ്രീ പാസ് നൽകുകയോ ചെയ്യുന്നതാണ് നല്ലത് എന്നും രാഹുല് ഈശ്വർ അഭിപ്രായപ്പെട്ടു.
ENGLISH SUMMARY:
Political commentator Rahul Easwar said that if free travel is allowed for women on KSRTC buses in Kerala, it should also be extended to men. Reacting to Rahul Gandhi’s promise of free bus travel for women, Easwar argued that benefits should be based on economic status rather than gender and warned that such policies could strain the state’s finances.
