ആനവാൽ മോതിരത്തിലെ ശ്രീനിവാസനെ വീണ്ടും ഓർത്ത് മലയാളികൾ
തിരുവനന്തപുരം: 1990 ഏപ്രിൽ 4ന് അടിവസ്ത്രത്തിനുള്ളിൽ ഒളിപ്പിച്ച 61 ഗ്രാം ഹാഷിഷുമായി ഓസ്ട്രേലിയൻ പൗരനായ ആൻഡ്രൂ സാൽവദോർ സർവലി അറസ്റ്റിലായ സംഭവം പിന്നീട് മലയാള സിനിമയിൽ ശ്രദ്ധേയമായൊരു കോടതി രംഗമായി മാറി.
1991 ഏപ്രിൽ 27ന് പുറത്തിറങ്ങിയ ‘ആനവാൽ മോതിരം’ എന്ന ചിത്രത്തിൽ ബാങ്കോക്കിൽ നിന്നെത്തുന്ന ആൽബർട്ടോ ഫെലിനി എന്ന കഥാപാത്രം ധരിച്ച അടിവസ്ത്രമാണ് സിനിമയിലെ പ്രധാന തൊണ്ടിമുതൽ.
ചിത്രത്തിലെ കഥ ഇങ്ങനെ: പൊലീസ് പിന്തുടരലിൽ നിന്ന് രക്ഷപ്പെടാൻ കിണറ്റിൽ വീഴുന്ന ആൽബർട്ടോ ഫെലിനിയെ (ഗാവിൻ പക്കാഡ്) ലോക്കപ്പിൽ ചോദ്യം ചെയ്യുന്നതിനിടെയാണ് അടിവസ്ത്രത്തിനുള്ളിൽ ഒളിപ്പിച്ച ഹെറോയിൻ കണ്ടെത്തുന്നത്.
കിലോഗ്രാമിന് ഒരു കോടി രൂപ വിലവരുന്ന മയക്കുമരുന്നാണിതെന്ന് എസ്.ഐ. നന്ദകുമാർ (സുരേഷ് ഗോപി) സി.ഐ. ജെയിംസ് പള്ളിത്തറയെ (ശ്രീനിവാസൻ) അറിയിക്കുന്നു.
പിന്നീടെത്തുന്ന കോടതി രംഗം യഥാർത്ഥ സംഭവത്തെ ശക്തമായി ഓർമ്മിപ്പിക്കുന്നതാണ്. പ്രതിഭാഗം അഭിഭാഷകൻ സി.ഐ. ജെയിംസിനോട് ചോദിക്കുന്നു:
“നിങ്ങൾ പിടിച്ചെടുത്തുവെന്ന് പറയുന്ന പൊടി എന്തായിരുന്നു?”
“ഹെറോയിൻ,” ജെയിംസ് മറുപടി നൽകുന്നു.
“എവിടെയായിരുന്നു ഒളിപ്പിച്ചത്?”
“ഡ്രോയറിന്റെ ഇലാസ്റ്റിക് ബാൻഡിൽ,” എന്ന മറുപടിയോടെ ചോദ്യംചെയ്യൽ തുടരുന്നു.
അടിവസ്ത്രം കോടതിയിൽ തെളിവായി ഹാജരാക്കിയപ്പോൾ, പതിനഞ്ചു വയസ്സുകാരനു പോലും പാകമാകാത്ത ഈ ഡ്രോയർ ആൽബർട്ടോയെ ധരിപ്പിക്കാനാകുമോ എന്ന ചോദ്യത്തിലേക്ക് അഭിഭാഷകൻ എത്തുന്നു.
“യെസ് ഓർ നോ?” എന്ന നിർണായക ചോദ്യത്തിന് സി.ഐ. ജെയിംസിന്റെ മറുപടി “നോ” ആയതോടെ കോടതി വിധി പ്രതിക്ക് അനുകൂലമായി മാറുന്നു.
ടി. ദാമോദരന്റെ തിരക്കഥയിൽ ജി.എസ്. വിജയൻ സംവിധാനം ചെയ്ത ‘ആനവാൽ മോതിരം’ ബ്രിട്ടീഷ് സംവിധായകൻ ഗ്രെഗ് ചാമ്പ്യന്റെ ‘ഷോർട്ട് ടൈം’ എന്ന കോമഡി ചിത്രത്തിൽ നിന്ന് പ്രചോദനം ഉൾക്കൊണ്ടാണ് തയ്യാറാക്കിയത്.
തിരക്കഥയിൽ ചില മാറ്റങ്ങൾ ശ്രീനിവാസനും സംവിധായകനും ചേർന്ന് നിർദേശിച്ചിരുന്നുവെന്നും സിനിമാ ചരിത്രം പറയുന്നു.
English Summary:
A real-life drug smuggling case from 1990 inspired one of the most memorable courtroom scenes in Malayalam cinema. The 1991 film Anaval Mothiram depicted a smuggling case where drugs hidden inside underwear became the crucial piece of evidence, leading to the accused’s acquittal. Written by T. Damodaran and directed by G.S. Vijayan, the film drew inspiration from the British movie Short Time.
anaval-mothiram-real-life-drug-case-inspiration
Anaval Mothiram, Malayalam cinema, real life inspiration, drug smuggling case, T Damodaran, Suresh Gopi, Srinivasan, Malayalam movie history, courtroom scene
