കൊച്ചിയുടെ രാത്രി കാഴ്ചകൾക്ക് ഇനി ‘ഡബിൾ’ വൈബ്
കൊച്ചി: കൊച്ചിയുടെ രാത്രി സൗന്ദര്യം ആസ്വദിക്കാനുള്ള ഓപ്പൺ ഡബിൾ ഡക്കർ ബസ് സർവീസിന്റെ ഉദ്ഘാടനം ഇന്ന് നടക്കും.
ചൊവ്വാഴ്ച വൈകിട്ട് 5 മണിക്ക് കെഎസ്ആർടിസി ജെട്ടി സ്റ്റാൻഡിൽ, വ്യവസായ വകുപ്പ് മന്ത്രി പി.രാജീവ് കൊച്ചി ഡബിൾ ഡക്കർ സർവീസ് ഉദ്ഘാടനം ചെയ്യും.
തിരുവനന്തപുരം, മൂന്നാർ എന്നിവിടങ്ങളിൽ കെഎസ്ആർടിസി ആരംഭിച്ച ഡബിൾ ഡക്കർ സർവീസുകളുടെ മാതൃകയിലാണ് കൊച്ചിയിലും ഡബിൾ ഡക്കർ ബസ് എത്തിച്ചിരിക്കുന്നത്.
റൂട്ട് ഇങ്ങനെ
എറണാകുളം കെഎസ്ആര്ടിസി ബസ് സ്റ്റാൻഡിൽ നിന്നു വൈകിട്ട് 5 മണിക്ക് ആണ് ബസ് പുറപ്പെടുക.
തേവര, സിഒപിറ്റി അവന്യൂ വാക്ക് വേ, മറൈൻ ഡ്രൈവ്, കാളമുക്ക്, വല്ലാർപാടം ചർച്ച്, ഹൈകോർട്ട് വഴി വൈകിട്ട് 7.40ന് എറണാകുളത്ത് തിരിച്ചെത്തുന്ന വിധമാണ് സർവീസിന്റെ ക്രമീകരണം.
മുകളിലത്തെ ഡെക്കിൽ ആളൊന്നിന് 300 രൂപയും താഴത്തെ ഡെക്കിൽ 150 രൂപയുമാണ് ടിക്കറ്റ് നിരക്ക് നിശ്ചയിച്ചിരിക്കുന്നത്.
അതേസമയം ഫിറ്റ്നെസ് തീർന്ന 34 വർഷം പഴക്കമുള്ള ബസ് ഓടിക്കുന്നതിലെ വിമർശനവും മഴക്കാലത്ത് തുറന്ന മേൽക്കൂരയുള്ള ബസ് ഓടിക്കുന്ന ട്രോളുകളും സമൂഹമാധ്യമങ്ങളിൽ വ്യാപകമായിട്ടുണ്ട്.
‘ആഹാ വെറും 34 വർഷം മാത്രം പഴക്കമുള്ള നല്ല പുതുപുത്തൻ വണ്ടി ആണല്ലോ. ഇതോടെ കൊച്ചിയിൽ കെഎസ്ആർടിസി വക പുരാവസ്തുക്കളുടെ എണ്ണം രണ്ടായി. ഒന്ന് ഈ വണ്ടിയും മറ്റൊന്ന് ആ സ്റ്റാൻഡും’– എന്നാണ് ഒരാൾ ഫെയ്സ്ബുക്ക് കുറിപ്പിലൂടെ പരിഹസിക്കുന്നത്.
‘മഴക്കാലത്തു യാത്ര ബുദ്ധിമുട്ടാകും. മുകളിൽ ട്രാൻസ്പേരന്റ് ഷീറ്റ് കവർ ചെയ്താൽ നന്നായിരിക്കും’ എന്നും ആളുകൾ പറയുന്നു.
കെഎസ്ആര്ടിസിയുടെ പുതിയ ബസുകൾ ഓടിച്ച് ഗണേഷ്കുമാർ; ബാക്കി ഉടൻ എത്തുമെന്നും മന്ത്രി
തിരുവനന്തപുരം: കെഎസ്ആര്ടിസിയുടെ പുതിയ സൂപ്പര്ഫാസ്റ്റ്, ഫാസ്റ്റ് പാസഞ്ചര് ബസുകള് ഓടിച്ചു നോക്കി ഗതാഗതമന്ത്രി കെ.ബി.ഗണേഷ്കുമാര്.
‘പുതിയ ബസുകൾ വരുമെന്ന് പറഞ്ഞു… വന്നു…’ എന്ന് തുടങ്ങുന്ന കുറിപ്പോടെ ബസ് ഓടിക്കുന്നതിന്റെ വീഡിയോയും മന്ത്രി പങ്കുവെച്ചിട്ടുണ്ട്.
വാങ്ങിയ ചില നിര്ദേശങ്ങള് ബന്ധപ്പെട്ടവരെ അറിയിച്ചിട്ടുണ്ടെന്നും ചെറിയ മാറ്റങ്ങള് മാത്രം വരുത്തി ഉടന് തന്നെ ബാക്കി ബസുകള് കൂടി എത്തുമെന്നും മന്ത്രി അറിയിച്ചു. ഒട്ടും വൈകാതെ സുഖയാത്ര ഉറപ്പാണെന്നും മന്ത്രി പറഞ്ഞു.
അതേസമയം, പുതിയ കെഎസ്ആര്ടിസി ബസിന്റെ ഡിസൈന് സംബന്ധിച്ച് സമൂഹമാധ്യമങ്ങളില് വലിയ വിമര്ശനമാണ് ഉയരുന്നത്.
കാലാനുസൃതമായ ഡിസൈനിന് പകരം ആകര്ഷകമല്ലാത്ത ഡിസൈനും പെയിന്റിങുമാണ് പുതിയ ബസുകള്ക്ക് നല്കിയിരിക്കുന്നതെന്നാണ് പ്രധാന വിമര്ശനം.
ഓട്ടമൊബീൽ കോർപറേഷൻ ഓഫ് ഗോവ ലിമിറ്റഡ് എന്ന ബസ് നിർമാതാക്കളാണ് ടാറ്റയുടെ ഈ ബസിന്റെ ബോഡി നിർമിച്ചിരിക്കുന്നത്.
പുതിയ 143 ബസുകള് വാങ്ങുന്നതിനായാണ് കെഎസ്ആര്ടിസി അഡ്വാന്സ് നല്കിയത്.
ടാറ്റ, അശോക് ലെയ്ലാന്ഡ്, ഐഷര് കമ്പനികളില് നിന്നാണ് ബസുകള് വാങ്ങുന്നത്. ആദ്യ ഘട്ടമായി എത്തുന്ന 80 ബസ്സുകളില് 60 സൂപ്പര് ഫാസ്റ്റും 20 ഫാസ്റ്റ് പാസഞ്ചറുമാണുള്ളത്. എട്ട് എസി സ്ലീപ്പറുകള്, 10 എസി സ്ലീപ്പര് കം സീറ്ററുകള്, എട്ട് എസി സെമി സ്ലീപ്പറുകളും ഉണ്ട്.
കൂടാതെ ഓര്ഡിനറി സര്വീസ് നടത്തുന്നതിനായി 9 മീറ്റര് നീളമുള്ള ബസുകള് ഉള്പ്പെടെ 37 ചെറിയ ബസുകള്ക്കും ഓർഡർ നൽകിയിട്ടുണ്ട്.
പുതിയ ബസുകള് വാങ്ങാനായി 107 കോടി രൂപയാണ് സര്ക്കാര് ബജറ്റില് പ്രഖ്യാപിച്ചത്. ഇതില് 62 കോടി രൂപയാണ് ധനവകുപ്പ് അനുവദിച്ചിരുന്നത്.
Summary: The open double-decker bus service to enjoy Kochi’s night beauty will be inaugurated today at 5 PM at KSRTC Jetty Stand by Industries Minister P. Rajeev. The service offers a scenic night ride through the city.
