ലോകം മുഴുവൻ ആരാധകരുള്ള താരമാണ് ഷാരൂഖ്.തന്റെ 57-ാം വയസിലും യുവാക്കളെ വരെ തോൽപ്പിക്കുന്ന ശരീര പ്രകൃതവുമായാണ് കിംഗ് ഖാൻ ബോളിവുഡ് ലോകം അടക്കി ഭരിക്കുന്നത്. പത്താനിലെയും ജവാനിലെയുമൊക്കെ ഷാരൂഖ് ഖാൻറെ മേക്കോവറുകൾ ആരാധകരെ ശരിക്കും അമ്പരിപ്പിച്ചതാണ്. ചിട്ടയായ ഭക്ഷണശീലവും കർശനമായ ഫിറ്റ്നസും പിന്തുടരുന്നയാളാണ് കിങ് ഖാൻ. എന്നാൽ അവ എന്തൊക്കെയാണെന്ന് ഇതുവരെ താരം വെളിപ്പെടുത്തിയിട്ടില്ലായിരുന്നു..അതുകൊണ്ട് തന്നെ താരത്തിന്റെ ഫിറ്റ്‌നസ് രഹസ്യം അറിയാൻ ആരാധകർക്ക് ആവേശമാണ്. ഇപ്പോഴിതാ താരം ആ രഹസ്യം വെളിപ്പെടുത്തിയിരിക്കുന്നു.
സാധാരണ ഭക്ഷണങ്ങൾ തന്നെയാണ് അദ്ദേഹം കഴിക്കാറുള്ളത്. ദിവസവും രണ്ട് നേരം മാത്രമേ ഭക്ഷണം കഴിക്കുകയുള്ളൂ എന്നും ഷാരൂഖ് ഖാൻ പറയുന്നു. ഭക്ഷണ ശൈലിയിൽ ധാന്യങ്ങൾ, ഗ്രിൽഡ് ചിക്കൻ, ബ്രൊക്കോളി, മുളപ്പിച്ച പയറുകൾ എന്നിവ ഉൾപ്പെടുത്താറുണ്ടെന്ന് ഷാരൂഖ്ഖാൻ പറഞ്ഞു. സീസണൽ ഗ്രിൽ ചെയ്ത പച്ചക്കറികളാണ് തന്റെ ഭക്ഷണത്തിലെ മറ്റൊരു പ്രധാന ഐറ്റം. ഇതിൽ നാരുകളുള്ളതിനാൽ വിശപ്പ് കുറയ്ക്കാൻ സഹായിക്കുമെന്നാണ് താരം പറയുന്നത്. അതേസമയം സംസ്‌ക്കരിച്ച ധാന്യങ്ങളോ അതുകൊണ്ട് ഉണ്ടാക്കുന്ന വിഭവങ്ങളോ അദ്ദേഹം കഴിക്കാറില്ല. അതായത്, മൈദ, റവ, ആട്ട എന്നിവയൊന്നും താരം ഉപയോഗിക്കാറില്ല.
ഒരു ദിവസം ശരീരത്തിലെ ജലാംശം നിലനിർത്തുന്നതിൽ ഷാരൂഖ് ഖാൻ പ്രത്യേകം ശ്രദ്ധിക്കാറുണ്ട്. ഇടയ്ക്കിടെ വെള്ളം കുടിക്കുന്ന ശീലവുമുണ്ട്. കരിക്കിൻവെള്ളം, ജ്യൂസ് എന്നിവയും അദ്ദേഹം കുടിക്കുന്നു. പ്രോട്ടീൻ ധാരാളം അടങ്ങിയ ഭക്ഷണമാണ് ഷാരൂഖ് പ്രധാനമായും കഴിക്കുന്നതെന്ന് അദ്ദേഹത്തിന്റെ ഡയറ്റീഷ്യനും വെളിപ്പെടുത്തിയിരുന്നു. ഭക്ഷണശീലം മാത്രമല്ല, കുറഞ്ഞത് ഒരു മണിക്കൂറെങ്കിലും അദ്ദേഹം വ്യായാമം ചെയ്യാനായി ചെലവിടാറുണ്ട്.
എന്തായാലും ആരാധകരുടെ പ്രിയങ്കരനായ ഷാരൂഖ് ഖാൻ തന്റെ ഡയറ്റിനെക്കുറിച്ചു പങ്കുവെച്ച കാര്യങ്ങൾ ഇപ്പോൾ സാമൂഹികമാധ്യമങ്ങളിൽ ശ്രദ്ധ പിടിച്ചുപറ്റുകയാണ് .ഇത്ര കുറച്ച് കഴിച്ച് എങ്ങനെ ഇത്രയും ഫിറ്റായിരിക്കുന്നുവെന്നാണ് പലരുടെയും ചോദ്യം.
