സെമിത്തേരിയ്ക്ക് തുല്യം. ലോകാരോ​ഗ്യസംഘടനയുടെ മുന്നറിയിപ്പ്.

ന്യൂസ് ഡസ്ക്ക് : ​ഗാസയിലെ ഏറ്റവും വലിയ ആശുപത്രിയായ അൽഷിഫയുടെ അവസ്ഥ സെമിത്തേരിയ്ക്ക് തുല്യമെന്ന് ലോകാരോ​ഗ്യസംഘടന. ആശുപത്രി ​ഗേറ്റുകളിൽ എല്ലാം ഇസ്രയേൽ ടാങ്കുകൾ വിന്യസിച്ച് കഴിഞ്ഞു. മരുന്ന്, ഭക്ഷണം, ഓക്സിജൻ എന്നിവ ആശുപത്രിയ്ക്കുള്ളിലേയ്ക്ക് എത്തിയിട്ട് ആഴ്ച്ചകളായി. അതീവ ശ്രദ്ധവേണ്ട നവജാത ശിശുകൾ, ഡയാലിസിസ് രോ​ഗികൾ എന്നിവർ മരണം കാത്ത് കിടക്കുന്നു. ചികിത്സ ലഭിക്കാത്തതിനാൽ മരണപ്പെട്ട നിരവധി മൃതദേഹങ്ങൾ ആശുപത്രിയുടെ ഒരു ഭാ​ഗത്ത് കൂട്ടിയിട്ടിരിക്കുന്നു. ആശുപത്രിയുടെ നിലവറ ഹമാസ് കേന്ദ്രമെന്ന ആരോപണം ആവർത്തിക്കുന്ന ഇസ്രയേൽ പ്രതിരോധ സേന എപ്പോൾ വേണമെങ്കിലും അശുപത്രിയ്ക്ക് ഉള്ളിൽ കയറാം. ലോകാരോ​ഗ്യ സംഘടന വക്സാവ് ക്രിസ്ത്യൻ ലിൻഡ്മേരെ നൽകുന്ന വിവരപ്രകാരം ഏകദേശം 600 രോ​ഗികൾ ഇപ്പോൾ ആശുപത്രിക്കുള്ളിൽ ഉണ്ട്. 2500 പേർ നേരത്തെ ഉണ്ടായിരുന്നു. ഇവരെ ആശുപത്രിയ്ക്ക് പുറത്തേയ്ക്ക് വഴിയോരങ്ങളിലേയ്ക്ക് മാറ്റി. ആശുപത്രിയ്ക്ക് പുറത്തും മൃതദേഹങ്ങൾ ചിതറി കിടക്കുന്നു. ​ഗാസയിലെ സിവിലിയൻസിനെ സംരക്ഷിക്കാൻ നടപടി കൈകൊള്ളണമെന്ന് യുകെ പ്രധാനമന്ത്രി ഋഷി സുനക് ആവിശ്യപ്പെട്ടു.

അൽഷിഫ ആശുപത്രി സംരക്ഷിക്കണമെന്ന് അമേരിക്കൻ പ്രസിഡന്റ് ജോ ബേഡനും ആവിശ്യപ്പെട്ടു. പക്ഷെ ഹമാസ് തീവ്രവാദ കേന്ദ്രം തകർക്കാതെ ആശുപത്രി വിടില്ലെന്നാണ് ഇസ്രയേൽ സേനയുടെ നിലപാട്. രോ​ഗികളെ സുരക്ഷിതമായി മാറ്റാമെന്നും വാ​ഗ്ദാനം ഉണ്ട്. എന്നാൽ ആശുപത്രിക്ക് നേരെ നടക്കുന്ന ഏത് ആക്രമണത്തേയും ലോകാരോ​ഗ്യസംഘടന എതിർക്കുന്നു.

Read Also : പാലസ്തീനിലെ അവസാനത്തെ ആശുപത്രിയുടെ പ്രവർത്തനവും നിലച്ചു. 20 നവജാത ശിശുക്കൾ അന്ത്യാസന്ന നിലയിലെന്ന് ലോകാരോ​ഗ്യ സംഘടന.