ഭോപ്പാല്‍: കടുത്ത ചൂടില്‍, ചുട്ടുപൊള്ളുന്ന ട്രാക്കില്‍ വേഗത്തിന്റെ തീക്കാറ്റായി കേരളത്തിന്റെ കൗമാര അത്‌ലീറ്റുകള്‍. 3 സ്വര്‍ണമടക്കം 7 മെഡലുകളുമായി കേരളം ദേശീയ സ്‌കൂള്‍ അത്ലറ്റിക്‌സിന്റെ രണ്ടാം ദിവസം കരുത്തുകാട്ടി. ആണ്‍കുട്ടികളുടെ 400 മീറ്ററില്‍ പാലക്കാട് മാത്തൂര്‍ സിഎഫ്ഡി വിഎച്ച്എസ്എസിലെ പി.അഭിരാമും പെണ്‍കുട്ടികളുടെ 100 മീറ്ററില്‍ പാലക്കാട് പുളിയപറമ്പ് എച്ച്എസ്എസിലെ എസ്.മേഘയുമാണ് വ്യക്തിഗത ഇനങ്ങളില്‍ സ്വര്‍ണം നേടിയത്. ആണ്‍കുട്ടികളുടെ 4-100 മീറ്റര്‍ റിലേയിലും കേരള ടീം ഒന്നാമതെത്തി.

മീറ്റിന്റെ ആദ്യദിനത്തില്‍ ഒരു മെഡല്‍പോലും നേടാന്‍ കഴിയാതിരുന്ന കേരള സംഘത്തിന്റെ ഉജ്വല തിരിച്ചു വരവാണ് ഇന്നലെ കണ്ടത്. പോയിന്റ് പട്ടികയില്‍ ബംഗാളിനൊപ്പം കേരളം ഒന്നാം സ്ഥാനത്തെത്തി. കേരളത്തിനും ബംഗാളിനും 42 പോയിന്റാണുള്ളത്. 39 പോയിന്റുമായി ഹരിയാന തൊട്ടുപിന്നിലുണ്ട്. താപനില 45 ഡിഗ്രി സെല്‍ഷ്യസ് വരെയായി ഉയര്‍ന്ന ഭോപാല്‍ സ്റ്റേഡിയത്തില്‍ പ്രതികൂല സാഹചര്യങ്ങളെ അതിജീവിച്ചായിരുന്നു ഇന്നലെ മലയാളി താരങ്ങളുടെ മെഡല്‍നേട്ടം.

ആണ്‍കുട്ടികളുടെ ട്രിപ്പിള്‍ ജംപില്‍ മലപ്പുറം കടകശ്ശേരി ഐഡിയല്‍ ഇഎച്ച്എസ്എസിലെ മുഹമ്മദ് മുഹസിന്‍, പെണ്‍കുട്ടികളുടെ 400 മീറ്ററില്‍ കോട്ടയം പൂഞ്ഞാര്‍ എസ്എംവി എച്ച്എസ്എസിലെ സാന്ദ്രമോള്‍ സാബു, പെണ്‍കുട്ടികളുടെ 4-100 മീറ്റര്‍ റിലേ ടീം എന്നിവരാണ് വെള്ളി നേടിയത്. പോള്‍വോള്‍ട്ടില്‍ കോതമംഗലം മാര്‍ ബേസില്‍ എച്ച്എസ്എസിലെ എസ്.ആരതി വെങ്കലം സ്വന്തമാക്കി. ഇന്നു 12 ഫൈനലാണുള്ളത്.