തിരുവനന്തപുരം: കോണ്‍ഗ്രസ് പ്രവര്‍ത്തക സമിതിയിലെ സ്ഥിരം ക്ഷണിതാവ് പദവി ഏറ്റെടുക്കരുതെന്ന് രമേശ് ചെന്നിത്തലയ്ക്ക് മേല്‍ സമ്മര്‍ദ്ദം. ഐ ഗ്രൂപ്പ് നേതൃത്വമാണ് ചെന്നിത്തലയ്ക്ക് മേല്‍ സമ്മര്‍ദ്ദം ചെലുത്തുന്നത്. രമേശ് ചെന്നിത്തലയെ അപമാനിച്ചുവെന്നാണ് ഗ്രൂപ്പിന്റെ വിലയിരുത്തല്‍. ചെന്നിത്തലയെ ഒഴിവാക്കിയതിന് ന്യായീകരണമില്ലെന്ന നിലപാടിലാണ് ഗ്രൂപ്പ് നേതൃത്വം. 19വര്‍ഷം മുമ്പേ ചെന്നിത്തല സ്ഥിരം ക്ഷണിതാവാണെന്നതും ഗ്രൂപ്പ് നേതൃത്വം ചൂണ്ടിക്കാണിക്കുന്നുണ്ട്.
ഇതിനിടെ വിഷയത്തില്‍ പരസ്യ പ്രതികരണത്തിന് ചെന്നിത്തല ഇതുവരെ തയ്യാറായിട്ടില്ല. പുതുപ്പള്ളി തിരഞ്ഞെടുപ്പിനെ ബാധിച്ചേക്കുമെന്നുള്ളതിനാലാണ് രമേശ് ചെന്നിത്തല പരസ്യപ്രതികരണത്തിന് തയ്യാറാകത്തതെന്നാണ് അദ്ദേഹത്തോട് അടുപ്പമുള്ള കേന്ദ്രങ്ങള്‍ വ്യക്തമാക്കുന്നത്.
കോണ്‍ഗ്രസ് പ്രവര്‍ത്തക സമിതിയില്‍ ഉള്‍പ്പെടുത്താത്തതില്‍ രമേശ് ചെന്നിത്തല നേതൃത്വത്തെ പ്രതിഷേധം അറിയിക്കാനൊരുങ്ങുന്നതായും റിപ്പോര്‍ട്ടുണ്ട്. സ്ഥിരം ക്ഷണിതാവാക്കിയതിലുള്ള പ്രതിഷേധം ഹൈക്കമാന്റിനെ അറിയിക്കും. ശശി തരൂരിനെ ഉള്‍പ്പെടുത്തിയിട്ടും തന്നെ പരിഗണിച്ചില്ലെന്നാണ് ചെന്നിത്തലയുടെ പരാതി. ദേശീയ രാഷ്ട്രീയത്തിലെ തന്റെ പരിചയസമ്പത്ത് അവഗണിച്ചെന്നും ചെന്നിത്തലയ്ക്ക് പരാതിയുണ്ട്. എഐസിസി അദ്ധ്യക്ഷന്‍ മല്ലികാര്‍ജുന്‍ ഖാര്‍ഗെ, സോണിയ ഗാന്ധി, രാഹുല്‍ ഗാന്ധി എന്നിവര്‍ക്ക് പ്രതിഷേധമറിയിച്ച് കത്തയയ്ക്കും.
കോണ്‍ഗ്രസ് പ്രവര്‍ത്തക സമിതി പുനഃസംഘടനക്ക് ശേഷം ചെന്നിത്തലക്ക് സമാനമായി മറ്റു സംസ്ഥാനങ്ങളിലെ മുതിര്‍ന്ന നേതാക്കളും പരാതിയുമായി രംഗത്തെത്തിയതാണ് വിവരം. ഈ സാഹചര്യത്തില്‍ പരാതികള്‍ പരിഹരിക്കാന്‍ ഹൈക്കമാന്റ് തന്നെ മുന്‍കൈ എടുക്കുന്നതായാണ് സൂചന. ശശി തരൂര്‍, സച്ചിന്‍ പൈലറ്റ് എന്നിവരെ പ്രവര്‍ത്തക സമിതിയിലെത്തിക്കാന്‍ കഴിഞ്ഞതിലൂടെ സംസ്ഥാനങ്ങളിലെ ഭിന്നസ്വരങ്ങള്‍ അവസാനിപ്പിക്കാമെന്നാണ് കോണ്‍ഗ്രസ് വിലയിരുത്തല്‍.
