ന്യൂഡല്ഹി: ഗുസ്തി ഫെഡറേഷന് അധ്യക്ഷന് ബ്രിജ് ഭൂഷണിനെതിരെ ഗുസ്തി താരങ്ങള് നടത്തിവന്നിരുന്ന സമരത്തില് മുന്നിരയിലുണ്ടായിരുന്ന വിനേഷ് ഫോഗട്ടിനെതിരെ നോട്ടീസ് അയച്ച് ദേശീയ ഉത്തേജക മരുന്ന് പരിശോധനാ സമിതി (നാഷനല് ആന്റി ഡോപ്പിങ് ഏജന്സി). ഉത്തേജക വിരുദ്ധ നിയമങ്ങള് പാലിക്കുന്നതില് വീഴ്ച വരുത്തിയെന്ന് ആരോപിച്ചാണ് ഫോഗട്ടിനെതിരെ നോട്ടിസ് അയച്ചത്.
വിഷയത്തില് ഫോഗട്ട് രണ്ടാഴ്ചയ്ക്കകം മറുപടി നല്കണമെന്നും അറിയിച്ചു. വ്യാഴാഴ്ച ആരംഭിച്ച ബുഡാപെസ്റ്റിലെ റാങ്കിങ് സീരിസില് മത്സരിക്കാനിരിക്കെയാണ് ഫോഗട്ടിന് നോട്ടിസ് വരുന്നത്. നിലവില് ഏഷ്യന് ഗെയിംസ് ചാംപ്യനാണ് ഫോഗട്ട്.
ജൂണ് 27ന് പരിശോധനയ്ക്ക് ഹാജരാകാമെന്ന് അറിയിച്ചിരുന്നു. എന്നാല് പരിശോധനയ്ക്കായി അന്ന് സമിതി ഉദ്യോഗസ്ഥര് എത്തിയെങ്കിലും ഫോഗട്ട് ഹാജരായില്ലെന്നും നോട്ടിസില് പറയുന്നു.
