ന്യൂയോര്‍ക്ക്: : ഉപഭോക്താക്കള്‍ക്ക് വായിക്കാവുന്ന പോസ്റ്റുകളുടെ എണ്ണം ട്വിറ്റര്‍ നിശ്ചയിച്ചതിന് പിന്നാലെ നിര്‍ണ്ണായക പ്രഖ്യാപനവുമായി മെറ്റ. ട്വിറ്ററിന് സമാനമായ ആപ്പുമായാണ് മെറ്റ എത്തുന്നത്. ത്രെഡ്‌സ് എന്ന് പേരിട്ടിരിക്കുന്ന ആപ്പ് ഒരു മൈക്രോബ്ലോഗിംങ് പ്ലാറ്റ്‌ഫോമായിരിക്കും. മെറ്റാ മേധാവി മാര്‍ക്ക് സുക്കര്‍ബര്‍ഗും ട്വിറ്റര്‍ ഉടമ ഇലോണ്‍ മസ്‌കും തമ്മിലുള്ള മത്സരത്തിന്റെ ഏറ്റവും പുതിയ നീക്കമാണിത്.
ഇന്‍സ്റ്റഗ്രാമിന്റെ ടെക്സ്റ്റ് അധിഷ്ഠിത വെര്‍ഷനായാണ് ത്രെഡ്‌സ് വരുന്നത്. കൂടാതെ ഇന്‍സ്റ്റഗ്രാമില്‍ പിന്തുടരുന്ന അക്കൗണ്ടുകള്‍ പിന്തുടരാനും അതേ യുസര്‍നെയിം നിലനിര്‍ത്താനും ഉപഭോക്താക്കളെ അനുവദിക്കുമെന്ന് ആപ്പിള്‍ ആപ്പ് സ്റ്റോറിലെ ലിസ്റ്റിംഗിലൂടെ കാണിക്കുന്നു.
ട്വീറ്റ്‌ഡെക്ക് ഉള്‍പ്പെടെ ഉപയോഗിക്കുന്നതിനുള്ള നിയന്ത്രണങ്ങള്‍ ഇലോണ്‍ മസ്‌ക് ട്വിറ്ററില്‍ കൊണ്ട് വന്നതിന് പിന്നാലെയാണ് സമാന സ്വഭാവമുള്ള ആപ്പിന്റെ ലോഞ്ച്. മസ്‌കിന്റെ പരിഷ്‌കാരങ്ങള്‍ ട്വിറ്റര്‍ ഉപഭോക്താക്കള്‍ക്കിടയില്‍ കടുത്ത പ്രതികരണങ്ങള്‍ക്ക് ഇടയാക്കിയിരുന്നു.
അതേസമയം ഡിജിറ്റല്‍ പരസ്യങ്ങള്‍ക്കപ്പുറം ബിസിനസ് പുനരുജ്ജീവിപ്പിക്കാന്‍ വീഡിയോ, ക്രിയേറ്റര്‍, കൊമേഴ്‌സ് പങ്കാളിത്തം എന്നിവയില്‍ ശ്രദ്ധ കേന്ദ്രീകരിക്കാനുള്ള പദ്ധതികള്‍ ട്വിറ്റര്‍ കഴിഞ്ഞ മാസം പ്രഖ്യാപിച്ചിരുന്നു. മസ്‌ക് ഉടമസ്ഥതയേറ്റതിന് പിന്നാലെ ട്വിറ്റര്‍ വിട്ടുപോയ പരസ്യദാതാക്കളെ തിരിച്ചുപിടിക്കാനും ട്വിറ്റര്‍ ബ്ലൂ ടിക് പ്രോഗ്രാമിന്റെ ഭാഗമായി സബ്‌സ്‌ക്രിപ്ഷന്‍ വരുമാനം വര്‍ദ്ധിപ്പിക്കാനും നിരവധി നടപടികള്‍ സ്വീകരിച്ചിരുന്നു. ഒക്ടോബറില്‍ മസ്‌ക് സിഇഒ ആയി ചുമതലയേറ്റ ശേഷം ട്വിറ്റര്‍ നിരവധി മാറ്റങ്ങള്‍ക്ക് വിധേയമായിട്ടുണ്ട്. കാര്യമായ പരസ്യദാതാക്കളെ നഷ്ടപ്പെട്ടതിന് ശേഷം, ട്വിറ്റര്‍ പുതിയ സബ്‌സ്‌ക്രിപ്ഷന്‍ ഫീച്ചറുകള്‍ അവതരിപ്പിച്ചിരുന്നു.
