രജനികാന്തിനെ നായകനാക്കി നെല്സണ് ദിലീപ്കുമാര് സംവിധാനം ചെയ്ത ജയിലര് ആഗോളതലത്തില് 150 കോടി ക്ലബിലേക്ക്. രണ്ട് ദിവസം കൊണ്ട് ചിത്രം ആഗോളതലത്തില് 152.02 കോടിയാണ് നേടിയിരിക്കുന്നത് എന്ന് ട്രേഡ് അനലിസ്റ്റായ മനോബാല റിപ്പോര്ട്ട് ചെയ്യുന്നു. ആദ്യ ദിനത്തില് മാത്രം ചിത്രം 95.78 കോടിയാണ് ആഗോളതലത്തില് നേടിയത്. രണ്ടാം ദിനമായ ഇന്നലെ 56.24 കോടിയാണ് സിനിമയുടെ കളക്ഷന്.
കേരളത്തില് മികച്ച കളക്ഷനാണ് ചിത്രം നേടിയത്. മോഹന്ലാലിന്റെ കാമിയോ വേഷം തിയേറ്ററിലേക്ക് കൂടുതല് പ്രേക്ഷകരെ എത്തിക്കുന്നുണ്ട്. രണ്ട് ദിവസം കൊണ്ട് ചിത്രം കേരളത്തില് നിന്ന് മാത്രം 10.5 കോടിയാണ് സ്വന്തമാക്കിയിരിക്കുന്നത്. തമിഴ്നാട്ടിലും കേരളത്തിലും 2023ലെ ഏറ്റവും വലിയ ഓപ്പണിംഗ് നേടിയ ചിത്രമായിരിക്കുകയാണ് ജയിലര്. വിദേശത്ത് ചിത്രം 33 കോടിയാണ് ഇന്നലെ നേടിയത്. തമിഴ് സിനിമയിലെ മറ്റൊരു ഇന്ഡസ്ട്രി ഹിറ്റായി ജയിലര് മാറുമെന്നാണ് അനലിസ്റ്റുകള് നല്കുന്ന സൂചന.
തമിഴ്നാട്ടില് മുഴുവന് തിയേറ്ററുകളിലും കേരളത്തില് മുന്നൂറിലധികം തിയേറ്ററുകളിലുമാണ് ചിത്രം റിലീസ് ചെയ്തത്. സണ് പിക്ചേഴ്സിന്റെ ബാനറില് കലാനിധി മാരന് ആണ് നിര്മ്മാണം. മുത്തുവേല് പാണ്ഡ്യന് എന്ന ജയിലറുടെ വേഷത്തിലാണ് രജനികാന്ത് എത്തുന്നത്. രജനിക്കൊപ്പം ശിവരാജ്കുമാര്, ജാക്കി ഷ്രോഫ്, രമ്യ കൃഷ്ണന്, തമന്ന, യോഗി ബാബു, വിനായകന് എന്നിവരടക്കമുള്ള വലിയ താരനിരയാണ് നെല്സണ് ദിലീപ്കുമാര് ചിത്രത്തിന്റെ ഭാഗമാകുന്നത്.