ന്യൂഡല്‍ഹി: ഗുജറാത്തിലെ ബറൂച്ച് ജില്ലയിലെ ജംബുസാറിനടുത്തുള്ള കെമിക്കല്‍ ഫാക്ടറിയില്‍ വാതക ചോര്‍ച്ച. ശ്വാസതടസ്സം അനുഭവപ്പെട്ട 28 പേരെ ആശുപത്രിയില്‍ പ്രവേശിപ്പിച്ചു. ബറൂച്ച് ജില്ലയിലെ സരോദ് ഗ്രാമത്തിലെ പിഐ ഇന്‍ഡസ്ട്രീസിലാണ് സംഭവം. ടാങ്കില്‍ തീപിടിത്തമുണ്ടായതിനെ തുടര്‍ന്ന് ബ്രോമിന്‍ വാതകമാണ് ചോര്‍ന്നത്.
ബുധനാഴ്ച ഉച്ചയ്ക്ക് ഒരു മണിയോടെയാണ് വാതക ചോര്‍ച്ചയുണ്ടായത്. സംഭവം നടക്കുമ്പോള്‍, ഫാക്ടറിയില്‍ രണ്ടായിരത്തോളം തൊഴിലാളികള്‍ ഉണ്ടായിരുന്നു. എല്ലാവരെയും സുരക്ഷിതമായി ഒഴിപ്പിച്ചതായി വേദച്ച് പൊലീസ് സ്റ്റേഷനിലെ സബ് ഇന്‍സ്‌പെക്ടര്‍ വൈശാലി അഹിര്‍ അറിയിച്ചു. വാതക ചോര്‍ച്ച നിയന്ത്രണവിധേയമായെന്നും പൊലീസ് വ്യക്തമാക്കി.
