TOP NEWS
കാസര്കോട്: എറണാകുളം മഹാരാജാസ് കോളജിന്റെ പേരില് വ്യാജരേഖയുണ്ടാക്കിയ കേസില് എസ്എഫ്ഐ മുന് നേതാവും കാസര്കോട് തൃക്കരിപ്പൂര് സ്വദേശിനിയുമായ കെ.വിദ്യയുടെ (വിദ്യ വിജയന്) വീട്ടില് തൃക്കരിപ്പൂര് പൊലീസിനു പിന്നാലെ അഗളിപൊലീസും എത്തി. അഗളി സിഐ സലീമിന്റെ നേതൃത്വത്തില് തെളിവെടുപ്പ് പുരോഗമിക്കുന്നു.
തൃക്കരിപ്പൂര് പൊലീസ് എത്തിയപ്പോള് വീട് പൂട്ടിയ നിലയിലായിരുന്നു. തുടര്ന്ന് വിദ്യയുടെ ബന്ധു വീട് തുറന്നുകൊടുത്തു. തൃക്കരിപ്പൂര് പൊലീസ് സമീപത്തെ വീട്ടില് നിന്നും വിവരങ്ങള് തിരക്കി. വിദ്യയ്ക്കെതിരെ കേസ് രജിസ്റ്റര് ചെയ്തു 4 ദിവസം കഴിഞ്ഞിട്ടും അവരെ കണ്ടെത്തിയിട്ടില്ല. കാലടിയില് സംസ്കൃത സര്വകലാശാലയുടെ ഒരു ഹോസ്റ്റലിലാണു വിദ്യ ഒളിവില് താമസിക്കുന്നതെന്നാണു ആരോപണം.
വിദ്യയെ അറസ്റ്റ് ചെയ്ത് ചോദ്യം ചെയ്താല് മാത്രമേ വ്യാജരേഖ സംബന്ധിച്ച വിവരങ്ങള് അറിയാനാകൂ. അഗളി പൊലീസ് ഇന്സ്പെക്ടര് കെ.സലീമിന്റെ നേതൃത്വത്തിലുള്ള സംഘമാണു കേസ് അന്വേഷിക്കുന്നത്. അഗളി ഗവ. കോളജ് പ്രിന്സിപ്പല് ഇന് ചാര്ജ് ലാലിമോള് വര്ഗീസിന്റെ പരാതിയില് കേസ് രജിസ്റ്റര് ചെയ്ത അഗളി പൊലീസ് ഇന്നലെ കോളജിലെത്തി വിവരങ്ങള് ശേഖരിച്ചിരുന്നു. വിദ്യയ്ക്കെതിരെ മഹാരാജാസ് കോളജ് അധികൃതര് നല്കിയ പരാതിയില് എറണാകുളം സെന്ട്രല് സ്റ്റേഷനില് രജിസ്റ്റര് ചെയ്ത കേസും അഗളി സ്റ്റേഷനിലേക്കു വ്യാഴാഴ്ച കൈമാറി.
കാസര്കോട് നീലേശ്വരം കരിന്തളം ഗവ. ആര്ട്സ് ആന്ഡ് സയന്സ് കോളജില് വ്യാജ പ്രവൃത്തിപരിചയ സര്ട്ടിഫിക്കറ്റ് ഹാജരാക്കി നിയമനം നേടിയതുമായി ബന്ധപ്പെട്ടു നീലേശ്വരം പൊലീസ് രജിസ്റ്റര് ചെയ്ത കേസില് പൊലീസ് രേഖകള് പിടിച്ചെടുത്തിട്ടുണ്ട്.
