അജ്മാന്: അജ്മാനില് ഇന്ത്യക്കാരടക്കം ഒട്ടേറെ പ്രവാസികള് താമസിച്ചിരുന്ന ബഹുനില കെട്ടിടത്തില് ഉണ്ടായ തീപിടിത്തത്തെ തുടര്ന്ന് മാറ്റി താമസിച്ചവര് തിരികെ വീടുകളിലെത്തി. 207 പേരെയാണ് തീപിടിത്തത്തെ തുടര്ന്ന് താല്കാലിക താമസ കേന്ദ്രങ്ങളിലേക്ക് മാറ്റി താമസിപ്പിച്ചത്. ഇവരില് ഭൂരിഭാഗവും കെട്ടിടത്തിലേക്ക് തിരികെയെത്തിയതായാണ് വിവരം. ഈ കെട്ടിടത്തില് മലയാളികളടക്കമുള്ള നിരവധി പേര് താമസിക്കുന്നുണ്ട്.
16 അപ്പാര്ട്ട്മെന്റുകളും 13 വാഹനങ്ങളുമാണ് തീപിടിത്തത്തില് കത്തിനശിച്ചത്. ഷെയ്ഖ് ഖലീഫ ബിന് സായിദ് സ്ട്രീറ്റിലെ ബഹുനില കെട്ടിടത്തിലാണ് തീപിടിത്തമുണ്ടായത്. കെട്ടിടത്തിന് മുന്നില് പാര്ക്ക് ചെയ്തിരുന്ന വാഹനങ്ങളിലേക്കും തീ പടരുകയായിരുന്നു. ആര്ക്കും പരിക്കേറ്റതായി റിപ്പോര്ട്ടുകളില്ല. ഫ്ളാറ്റുകളില് ഉണ്ടായിരുന്ന സാധനങ്ങള് മുഴുവന് കത്തി നശിച്ചിരുന്നു. അജ്മാന് പൊലീസും സിവില് ഡിഫന്സ് വിഭാഗവും ചേര്ന്ന് തീ നിയന്ത്രണ വിധേയമാക്കിയത്.
കെട്ടിടത്തിലെ താമസക്കാരെയെല്ലാം വേഗത്തില് ഒഴിപ്പിക്കാനായതിനാല് വന് ദുരന്തമാണ് ഒഴിവായത്. തീപിടിത്തം ഉണ്ടാകാനുള്ള കാരണം വ്യക്തമായിട്ടില്ല. തീ പിടിത്തത്തിന്റെ ദൃശ്യങ്ങള് അജ്മാന് പൊലീസ് സമൂഹ മാധ്യമത്തിലൂടെ പങ്കുവച്ചിരുന്നു. താമസക്കാരോട് സുരക്ഷ മുന്കരുതലുകള് പാലിക്കണമെന്നും ജാഗ്രത പുലര്ത്തണമെന്നും അജ്മാന് പൊലീസ് ഓപ്പറേഷന്സ് ഡയറക്ടര് ജനറല് മേജര് അബ്ദുല്ല സെയ്ഫ് അല് മത്രൂഷി അറിയിച്ചു.