കൊല്ലം: കൊല്ലത്ത് പാമ്പുകടിയേറ്റ് ചികിത്സയിലായിരുന്ന യുവാവ് മരിച്ചു. അഞ്ചൽ ഏരൂരിലാണ് സംഭവം. ഏരൂർ സ്വദേശി സജുരാജ് ആണ് മരിച്ചത്. ഞായറാഴ്ച്ചയാണ് സജുരാജിനെ പാമ്പ് കടിച്ചത്. തുടർന്ന് കൊട്ടിയത്തെ സ്വകാര്യ ആശുപത്രിയിൽ ചികിത്സയിലായിരുന്നു.
ഞായറാഴ്ച കാടുവെട്ടി തെളിക്കുന്നതിനിടെയാണ് പാമ്പുകടി ഏറ്റത്. പ്രദേശത്ത് ഒരാഴ്ചയ്ക്കുള്ളിൽ പാമ്പുകടിയേറ്റ് മരിക്കുന്ന രണ്ടാമത്തെയാളാണ് സജു. പാമ്പു കടിയേറ്റ് ചികിത്സയിലായിരുന്ന തെക്കേവയൽ സ്വദേശി രാമചന്ദ്രൻ ശനിയാഴ്ച മരിച്ചിരുന്നു.
പ്രദേശത്ത് പാമ്പ് ശല്യം വർധിച്ചതോടെ ആർആർടി സംഘം സ്ഥലത്തെത്തി പരിശോധന നടത്തിയിരുന്നു. അഞ്ചൽ റേഞ്ച് ഫോറസ്റ്റ് പരിധിയിലുള്ള ഉദ്യോഗസ്ഥരാണ് പരിശോധനയ്ക്കെത്തിയത്. ജനങ്ങളുടെ പരാതിയെ തുടർന്ന് പഞ്ചായത്ത് അധികൃതരുടെ നേതൃത്വത്തിൽ ജനവാസ മേഖലയിലെ കാടുവെട്ടി തുടങ്ങി.
