പാക് സൈനികർ സഞ്ചരിച്ച ട്രെയിൻ ബോംബുവെച്ച് തകർത്തു! അമ്പതിലേറെ പേർക്ക് പരിക്ക്; ചോരക്കളമായി ബലൂചിസ്ഥാൻ
ഇസ്ലാമാബാദ്: പാകിസ്ഥാനിലെ ബലൂചിസ്ഥാൻ പ്രവിശ്യയിൽ റെയിൽവേ ട്രാക്കിന് സമീപമുണ്ടായ ശക്തമായ സ്ഫോടനത്തിൽ 24 പേർ കൊല്ലപ്പെട്ടതായും 50ലധികം പേർക്ക് പരിക്കേറ്റതായും റിപ്പോർട്ട്. സൈനികർ സഞ്ചരിച്ച ട്രെയിനിനെ ലക്ഷ്യമിട്ടായിരുന്നു ആക്രമണമെന്നാണ് പ്രാഥമിക വിവരം.
അന്താരാഷ്ട്ര വാർത്താ ഏജൻസികളുടെ റിപ്പോർട്ടുകൾ പ്രകാരം കൊല്ലപ്പെട്ടവരിൽ സൈനികരും ഉൾപ്പെടുന്നുണ്ട്. ഞായറാഴ്ച രാവിലെ ക്വറ്റയിലെ ചമൻ ഫടക് റെയിൽവേ സ്റ്റേഷൻ സമീപത്തായിരുന്നു സ്ഫോടനം.
ക്വറ്റയിൽ നിന്ന് പെഷാവറിലേക്ക് യാത്രതിരിച്ച ട്രെയിനിൽ 300-ലധികം പാക് സൈനികരും കുടുംബാംഗങ്ങളും ഉണ്ടായിരുന്നുവെന്നാണ് വിവരം. ഈദ് അവധി ആഘോഷിക്കാൻ യാത്ര ചെയ്യുന്നതിനിടെയായിരുന്നു ആക്രമണം നടന്നത്.
സ്ഫോടനത്തിന്റെ ആഘാതത്തിൽ ട്രെയിനിന്റെ ബോഗികൾ പാളം തെറ്റുകയും തീപിടിക്കുകയും ചെയ്തു. സമീപത്ത് പാർക്ക് ചെയ്തിരുന്ന നിരവധി വാഹനങ്ങളും തകർന്നു. സ്ഫോടനത്തിന്റെ ശക്തിയിൽ സമീപ കെട്ടിടങ്ങളിലെ ഗ്ലാസ് ചില്ലുകളും ജനലുകളും തകർന്നതായി പ്രാദേശിക മാധ്യമങ്ങൾ റിപ്പോർട്ട് ചെയ്തു.
റെയിൽവേ ട്രാക്കിൽ സ്ഥാപിച്ചിരുന്ന ഐഇഡി റിമോട്ട് കൺട്രോൾ വഴി പൊട്ടിത്തെറിപ്പിച്ചതാണെന്നാണ് പുറത്തുവരുന്ന വിവരം. ആക്രമണത്തിന് പിന്നാലെ ട്രെയിൻ പൂർണമായും കത്തിനശിച്ചു.
സ്ഫോടനത്തിന്റെ ഉത്തരവാദിത്തം ബലൂചിസ്ഥാൻ ലിബറേഷൻ ആർമിയുടെ മജീദ് ബ്രിഗേഡ് ഏറ്റെടുത്തതായും റിപ്പോർട്ടുകളുണ്ട്.
സംഭവത്തിന് പിന്നാലെ സുരക്ഷാസേന പ്രദേശം നിയന്ത്രണത്തിലാക്കി രക്ഷാപ്രവർത്തനം ശക്തമാക്കി. ആക്രമണത്തെ തുടർന്ന് മേഖലയിലെ റെയിൽ ഗതാഗതം താത്കാലികമായി നിർത്തിവെച്ചു.
English Summary
At least 24 people were killed and over 50 injured in a powerful explosion near a railway track in Pakistan’s Balochistan province. The blast reportedly targeted a train carrying Pakistani soldiers and their families, causing derailment and fire in multiple coaches.
pakistan-balochistan-train-blast-kills-many
പാകിസ്ഥാൻ, ബലൂചിസ്ഥാൻ, ട്രെയിൻ സ്ഫോടനം, ഭീകരാക്രമണം, ക്വറ്റ, പാക് സൈന്യം, ലോക വാർത്ത, ഐഇഡി സ്ഫോടനം, ബ്രേക്കിംഗ് ന്യൂസ്, റെയിൽ അപകടം
