വെറുമൊരു പാഴ്വസ്തുവല്ല, ആക്ടിവേറ്റഡ് കാർബണാണ്! തമിഴ്നാട്ടിലെയും കർണാടകത്തിലെയും കൂറ്റൻ ഫാക്ടറികളിൽ ചിരട്ടയ്ക്ക് വൻ ഡിമാൻഡ് വരാൻ കാരണം
കോലഞ്ചേരി: ഒരുകാലത്ത് അടുപ്പിൽ കത്തിക്കാനോ പറമ്പിലേക്ക് വലിച്ചെറിയാനോ മാത്രമായി കരുതിയിരുന്ന തേങ്ങാ ചിരട്ടയ്ക്ക് ഇന്ന് വിപണിയിൽ വൻ ആവശ്യകത. പഴയ പത്രവും പ്ലാസ്റ്റിക്കും ശേഖരിക്കാൻ വീടുകളിലെത്തുന്ന പാഴ്വസ്തു വ്യാപാരികളുടെ ആദ്യ ചോദ്യം തന്നെ ഇപ്പോൾ “ചിരട്ട ഉണ്ടോ?” എന്നതാണ്.
മുമ്പ് കിലോയ്ക്ക് 10 മുതൽ 15 രൂപ വരെ മാത്രമായിരുന്നു ചിരട്ടയുടെ വില. എന്നാൽ ഇപ്പോൾ 32 മുതൽ 35 രൂപ വരെ ലഭിക്കുന്നുണ്ടെന്നാണ് വ്യാപാരികൾ പറയുന്നത്. ചില പ്രദേശങ്ങളിൽ ഇതിലും ഉയർന്ന വില ലഭിക്കുന്നതായും സൂചനയുണ്ട്.
മഴ നനയാതെ ചിരട്ട ശേഖരിച്ച് സൂക്ഷിച്ചാൽ മാസാവസാനം നല്ലൊരു വരുമാനം നേടാമെന്ന സന്തോഷത്തിലാണ് പല വീട്ടമ്മമാരും. കേരളത്തിലെ ചെറുകിട ശേഖരണക്കാരിൽ നിന്ന് തമിഴ്നാട്, കർണാടക തുടങ്ങിയ സംസ്ഥാനങ്ങളിലെ വലിയ വ്യാപാരികളാണ് ചിരട്ട മൊത്തമായി വാങ്ങുന്നത്.
ലോറികളിൽ കയറ്റി കൊണ്ടുപോകുന്ന ഈ പാഴ്വസ്തു അവിടെയെത്തുമ്പോൾ വിലപിടിപ്പുള്ള വ്യവസായ അസംസ്കൃത വസ്തുവായി മാറുന്നു.
ചിരട്ടയിൽ നിന്ന് നിർമ്മിക്കുന്ന ഉയർന്ന ഗുണമേന്മയുള്ള ആക്ടിവേറ്റഡ് കാർബണിനാണ് ഇപ്പോൾ വിപണിയിൽ വൻ ആവശ്യകത. ജലശുദ്ധീകരണ ഫിൽറ്ററുകൾ, എയർ പ്യൂരിഫയർ, സൗന്ദര്യവർദ്ധക ഉൽപ്പന്നങ്ങൾ എന്നിവയിൽ ഇത് വ്യാപകമായി ഉപയോഗിക്കുന്നു.
ഇതിനുപുറമേ കൊതുകുതിരി, പ്ലൈവുഡ് വ്യവസായം, ഹുക്ക കൽക്കരി, വിവിധ രാസവസ്തു ഫിൽറ്ററുകൾ തുടങ്ങിയ മേഖലകളിലും കേരളത്തിലെ ഗുണമേന്മയുള്ള ചിരട്ടയ്ക്ക് ആവശ്യക്കാർ ഏറെയാണ്.
“ഇനി തേങ്ങയുടയ്ക്കുമ്പോൾ ചിരട്ട അടുപ്പിലേക്കല്ല, ചാക്കിലേക്കാണ് പോകേണ്ടത്” എന്നതാണ് സോഷ്യൽ മീഡിയയിലെ പുതിയ ട്രോൾ.
ഒരിക്കൽ പാഴ്വസ്തുവായി കണക്കാക്കിയിരുന്ന ചിരട്ട ഇന്ന് പല കുടുംബങ്ങൾക്കും ചെറിയൊരു അധിക വരുമാന മാർഗമായി മാറിക്കഴിഞ്ഞു.
English Summary
Coconut shells, once considered waste, have now become a valuable commodity in Kerala. The rising demand for activated carbon and industrial use has pushed prices up significantly, turning discarded coconut shells into a profitable source of income for households.
