അൻസിബയ്ക്ക് പിന്നാലെ ടിനി ടോമിനെതിരെ നീന കുറുപ്പും; കുടുംബ സംഗമത്തിനിടെ പരസ്യമായി അപമാനിക്കാനും ആക്രമിക്കാനും ശ്രമിച്ചെന്ന് പരാതി!
കൊച്ചി: നടൻ ടിനി ടോമിനെതിരെ താരസംഘടനയായ അമ്മയിൽ പരാതി നൽകി നടി നീന കുറുപ്പ്. സംഘടനയുടെ കുടുംബ സംഗമത്തിനിടെ ടിനി ടോം തന്നെ അപമാനിച്ചുവെന്നാണ് പരാതിയിൽ പറയുന്നത്.
പരസ്യമായി അസഭ്യവും അശ്ലീലവുമായ പരാമർശങ്ങൾ നടത്തിയതായും ശാരീരികമായി ഭീഷണിപ്പെടുത്തി ആക്രമിക്കാൻ ശ്രമിച്ചതായും നീന കുറുപ്പിന്റെ പരാതിയിൽ ആരോപിക്കുന്നു.
ഇതിനിടെ നടി അൻസിബ ഹസനും അടുത്തിടെ ടിനി ടോമിനെതിരെ പരസ്യമായി രംഗത്തെത്തിയിരുന്നു. താരസംഘടനയിൽ നിന്ന് രാജിവയ്ക്കാൻ കാരണമായത് ടിനി ടോമാണെന്നും ജോയിന്റ് സെക്രട്ടറിയായതിന് ശേഷം മാനസികമായി പീഡിപ്പിക്കുകയും വ്യാജ ആരോപണങ്ങളും അപവാദങ്ങളും പ്രചരിപ്പിക്കുകയും ചെയ്തുവെന്നുമാണ് അൻസിബ ആരോപിച്ചത്.
തന്നെ “ജിഹാദി” എന്ന് വിളിച്ചുവെന്നും പലരെയും മതംമാറ്റാൻ ശ്രമിക്കുന്നുവെന്ന രീതിയിൽ പ്രചാരണം നടത്തിയെന്നും മറ്റ് താരങ്ങളുമായി ബന്ധപ്പെടുത്തി അവിഹിത കഥകൾ പ്രചരിപ്പിച്ചുവെന്നും അൻസിബ ആരോപിച്ചു. ഇത്തരത്തിൽ സംസാരിക്കുന്ന ഒരാളോടൊപ്പം പ്രവർത്തിക്കാൻ കഴിയില്ലെന്നും അവർ വ്യക്തമാക്കി.
അതേസമയം, അൻസിബയെ “ജിഹാദി” എന്ന് വിളിച്ചിട്ടില്ലെന്നാണ് ടിനി ടോമിന്റെ വിശദീകരണം. വേദി പരിപാടികൾക്കിടെ ചില പ്രശ്നങ്ങൾ ഉണ്ടാകാമെന്നും ആരെയും അപമാനിക്കുന്ന തരത്തിൽ സന്ദേശങ്ങൾ അയച്ചിട്ടില്ലെന്നും അദ്ദേഹം പ്രതികരിച്ചു.
“പ്രവർത്തിക്കുന്നവരെ തകർക്കാനുള്ള ഗൂഢാലോചനയാണ് നടക്കുന്നത്. ജിഹാദി എന്ന് വിളിച്ചുവെന്ന കാര്യം മറ്റൊരാൾ പറഞ്ഞാണ് അൻസിബ അറിഞ്ഞതെന്ന് പറയുന്നു. അങ്ങനെ പറയാൻ പാടില്ല. നമുക്കൊരു നിയമസംവിധാനമുണ്ട്. ഞാൻ എങ്ങനെ അങ്ങനെ വിളിക്കും? എന്റെ സുഹൃത്തുക്കളിൽ പലരും മുസ്ലിംകളാണ്,” എന്നും ടിനി ടോം പറഞ്ഞു.
English Summary
Actress Neena Kurup has lodged a complaint against actor Tiny Tom with the AMMA organization, accusing him of verbal abuse and threatening behavior during a family gathering. Earlier, actress Ansiba Hassan had also accused Tiny Tom of mental harassment and spreading false allegations against her.
tiny-tom-complaint-neena-kurup-amma
ടിനി ടോം, നീന കുറുപ്പ്, അൻസിബ ഹസൻ, അമ്മ, മലയാള സിനിമ, സിനിമാ വിവാദം, വിനോദ വാർത്ത, കേരള വാർത്ത, താരസംഘടന
