ഇന്ത്യന് ബോക്സ്ഓഫീസില് ചരിത്രം സൃഷ്ടിച്ച സിനിമയാണ് ഷാറുഖ് ഖാന്റെ ‘പഠാന്’. ആഗോള തലത്തില് 1050 കോടി രൂപയാണ് നേടിയത്. ഇപ്പോഴിതാ ചിത്രത്തിന് ലഭിച്ച ലാഭ വിവര കണക്കുകള് പുറത്തുവിട്ട് ബോളിവുഡ് മാധ്യമങ്ങള്. 270 കോടിയായിരുന്നു ചിത്രത്തിന്റെ ബജറ്റ് എന്നാണ് ബോളിവുഡ് ഹംഗാമയുടെ റിപ്പോര്ട്ട്. റിലീസ് ദിനത്തില് 57 കോടി കളക്ട് ചെയ്ത ചിത്രം, കണക്കുകള് പ്രകാരം ഇന്ത്യയില് നിന്ന് നേടിയ ഗ്രോസ് കലക്ഷന് 657.85 കോടിയും നെറ്റ് കളക്ഷന് 543.22 കോടിയുമാണ്. വിദേശത്തുനിന്ന് 392.55 കോടി ഗ്രോസും. ആകെ 1050.40 കോടി.
കരിയറിലെ തുടര് പരാജയങ്ങളെത്തുടര്ന്ന് നാല് വര്ഷം സിനിമയില് നിന്ന് അകന്നു നിന്നതിനു ശേഷം ബോളിവുഡ് സൂപ്പര്താരം ഷാറുഖ് ഖാന് നായകനായെത്തിയ സിനിമയെന്ന പ്രത്യേകതയും പഠാനുണ്ട്. ഇപ്പോഴിതാ നായക കഥാപാത്രത്തെ അവതരിപ്പിച്ച ഷാറുഖ് ഖാന് ലഭിച്ച പ്രതിഫലത്തിന്റെ കണക്കുകളും പുറത്തുവന്നിരിക്കുന്നു.
മുന്കൂട്ടി നിശ്ചയിക്കപ്പെട്ട പ്രകാരമായിരുന്നില്ല ഷാറുഖിന്റെ പ്രതിഫലം. ലാഭവിഹിതം പങ്കുവയ്ക്കുന്ന കരാര് ആയിരുന്നു യാഷ് രാജ് ഫിലിംസും ഷാറുഖുമായി ഉണ്ടായിരുന്നത്. നിര്മാതാവിന് ലഭിക്കുന്ന ലാഭത്തിന്റെ 60 ശതമാനം എന്നായിരുന്നു കരാര്. ഓവര്സീസ്, ഡിസ്ട്രിബ്യൂഷന്, സാറ്റലൈറ്റ്, ഓഡിയോ, ഒടിടി തുടങ്ങിയ അവകാശങ്ങളിലെല്ലാം ചിത്രം കോടികള് വാരി. മുഴുവന് വരുമാനവും പരിഗണിക്കുമ്പോള് 270 കോടി മുടക്കിയ യാഷ് രാജ് ഫിലിംസിന് ലഭിച്ചത് 603 കോടിയാണ്. അതായത് 333 കോടി രൂപ ലാഭം! കരാര് പ്രകാരം ഷാറുഖ് ഖാന് ലഭിക്കുക 200 കോടി ആണെന്ന് ബോളിവുഡ് ഹംഗാമ റിപ്പോര്ട്ട് ചെയ്യുന്നു.
ഇന്ത്യയില് നിന്ന് ചിത്രം നേടിയ ഡിസ്ട്രിബ്യൂട്ടേഴ്സ് ഷെയര് 245 കോടിയും വിദേശത്തു നിന്നുള്ള ഓവര്സീസ് ഡിസ്ട്രിബ്യൂട്ടേഴ്സ് ഷെയര് 178 കോടിയുമാണ്. സാറ്റലൈറ്റ്, ഡിജിറ്റല് റൈറ്റുകളുടെ വില്പ്പനയില് നിന്ന് മറ്റൊരു 150 കോടിയും മ്യൂസിക് റൈറ്റ്സില് നിന്ന് 30 കോടിയും ലഭിച്ചു.
