റായ്പുര്‍: ഛത്തിസ്ഗഡില്‍ മാവോയിസ്റ്റ് ആക്രമണത്തില്‍ 10 ജവാന്മാര്‍ക്ക് വീരമൃത്യു. ജവാന്മാരുടെ വാഹനമോടിച്ച ഡ്രൈവറും കൊല്ലപ്പെട്ടു. ദന്തേവാഡയില്‍ പട്രോളിങ്ങിനിടെയുണ്ടായ സ്‌ഫോടനത്തിലാണ് ജവാന്മാര്‍ കൊല്ലപ്പെട്ടത്. ബുധനാഴ്ച ഉച്ചകഴിഞ്ഞ് അറന്‍പുര്‍ പാതയില്‍ പട്രോളിങ് നടത്തുന്നതിനിടെയാണ് ഡിആര്‍ജി (ഡിസ്ട്രിക്ട് റിസര്‍വ് ഗാര്‍ഡ്) സംഘത്തിനു നേരെ ആക്രമണമുണ്ടായത്.
ഡിആര്‍ജി ആസ്ഥാനത്തേക്ക് വാഹനത്തില്‍ മടങ്ങുന്നതിനിടെ അറന്‍പുര്‍ റോഡില്‍ അക്രമികള്‍ സ്ഥാപിച്ച സ്‌ഫോടകവസ്തുക്കള്‍ പൊട്ടിത്തെറിക്കുകയായിരുന്നു. പത്തു ജവാന്മാരും ഡ്രൈവറുമാണ് കൊല്ലപ്പെട്ടതെന്നാണ് റിപ്പോര്‍ട്ട്. മരണസംഖ്യ സംബന്ധിച്ച കൂടുതല്‍ വിവരങ്ങള്‍ പുറത്തുവരാനുണ്ട്.
സുരക്ഷാസേനയെ ആക്രമിക്കുമെന്ന് കഴിഞ്ഞ ആഴ്ച ഭീഷണിസന്ദേശം അയച്ചെന്ന് ചില വൃത്തങ്ങള്‍ അറിയിച്ചു. സംഭവത്തില്‍ മുഖ്യമന്ത്രി ഭൂപേഷ് ബാഗല്‍ അനുശോചനമറിയിച്ചു. സംഭവസ്ഥലത്തേക്ക് രക്ഷാപ്രവര്‍ത്തകരെ അയച്ചിട്ടുണ്ടെന്നും അറിയിച്ചു.