തിരുവനന്തപുരം: വാഹനപരിശോധന കാര്യക്ഷമമായി നടത്താത്ത മോട്ടര് വാഹന വകുപ്പിലെ ഉദ്യോഗസ്ഥര്ക്ക് ഗതാഗത കമ്മിഷണറുടെ കാരണം കാണിക്കല് നോട്ടീസ്. വാഹനങ്ങള് പരിശോധിച്ച് ഒരു മാസം 50 നിയമലംഘനങ്ങളെങ്കിലും കണ്ടെത്താത്ത ഉദ്യോഗസ്ഥര്ക്കാണ് നോട്ടിസ്. ഗതാഗത നിയമങ്ങള് കര്ശമായി പാലിക്കണമെന്ന് ഹൈക്കോടതി നിര്ദേശമുള്ളതിനാലാണ് ഉദ്യോഗസ്ഥര്ക്ക് മാസം ടാര്ഗറ്റ് നിശ്ചയിച്ചിരിക്കുന്നതെന്ന് അധികൃതര് പറഞ്ഞു. കാരണം കാണിക്കല് നോട്ടീസ് അയയ്ക്കുന്നത് പതിവ് നടപടിക്രമമാണ്. 50 നിയമലംഘനങ്ങളെങ്കിലും കണ്ടെത്തണമെന്ന് നിര്ദേശമുണ്ടെങ്കിലും പല ഉദ്യോഗസ്ഥരും പാലിക്കാറില്ല.
ചിലര് ചെക്പോസ്റ്റ് ഡ്യൂട്ടി അടക്കമുള്ള മറ്റ് ഡ്യൂട്ടികളിലായിരിക്കും. എല്ലാ മാസവും പ്രവര്ത്തനം വിലയിരുത്തുമ്പോള് പിന്നില് നില്ക്കുന്ന ഉദ്യോഗസ്ഥര്ക്കാണ് കാരണം കാണിക്കല് നോട്ടീസ് നല്കുന്നത്. ഉദ്യോഗസ്ഥര് കാരണം ബോധിപ്പിക്കുന്നതോടെ സാധാരണയായി നടപടി അവസാനിപ്പിക്കും. ഗുരുതരമായ വീഴ്ച കണ്ടെത്തിയാല് വകുപ്പുതല നടപടികളിലേക്ക് കടക്കും.
നാലായിരത്തില് അധികം പേരാണ് ഒരു വര്ഷം കേരളത്തില് റോഡ് അപകടങ്ങളില് മരിക്കുന്നത്. റോഡ് അപകടങ്ങള് കുറയ്ക്കാന് കര്ശന പരിശോധന നടത്താനും ബോധവല്ക്കരണ പ്രവര്ത്തനത്തിനും ഗതാഗത കമ്മീഷണര് നിര്ദേശം നല്കിയിരുന്നു. റോഡുകളിലെ ബ്ലാക് സ്പോട്ടുകള് കേന്ദ്രീകരിച്ച് ജനങ്ങളില് ബോധവല്ക്കരണം നടത്താനും വിവിധ പരിപാടികള് സംഘടിപ്പിക്കാനും നിര്ദേശമുണ്ടായിരുന്നു. എന്നാല്, ചില ഉദ്യോഗസ്ഥര് ഇക്കാര്യത്തില് വീഴ്ച വരുത്തുന്നതായി കണ്ടെത്തി. ഇവര്ക്കും കാരണം കാണിക്കല് നോട്ടീസ് നല്കി.
