കാസര്കോട്: സമൂഹമാധ്യമങ്ങളില് അധിക്ഷേപം നേരിട്ടതിനെത്തുടര്ന്നു കോട്ടയം കോതനല്ലൂര് വരകുകാലായില് ആതിര മുരളീധരന് (26) ജീവനൊടുക്കിയ സംഭവത്തിലെ പ്രതി കോതനല്ലൂര് മുണ്ടയ്ക്കല് അരുണ് വിദ്യാധരനെ (32) മരിച്ചനിലയില് കണ്ടെത്തി. കാസര്കോട് കാഞ്ഞങ്ങാട്ടെ ലോഡ്ജിലാണ് അരുണിനെ മരിച്ചനിലയില് കണ്ടെത്തിയത്. മലപ്പുറം സ്വദേശിയായ രാജേഷ് എന്ന പേരിലാണ് അരുണ് ലോഡ്ജില് മുറിയെടുത്തിരുന്നത്.
സംഭവത്തില് പ്രതി അരുണിനെതിരെ ഇന്നലെ വൈകിട്ട് പൊലീസ് ലുക്ക്ഔട്ട് നോട്ടിസ് പുറപ്പെടുവിച്ചിരുന്നു. അരുണ് ഞായറാഴ്ചയാണു സമൂഹമാധ്യമങ്ങളിലൂടെ ആതിരയ്ക്കും കുടുംബത്തിനുമെതിരെ സൈബര് അധിക്ഷേപം നടത്തിയത്. ഞായറാഴ്ച രാത്രി ആതിര കടുത്തുരുത്തി പൊലീസ് സ്റ്റേഷനില് പരാതി നല്കിയ ശേഷം തിങ്കളാഴ്ച പുലര്ച്ചെ ജീവനൊടുക്കുകയായിരുന്നു. അരുണിന്റെ ഫോണില് നിന്ന് അവസാനം സിഗ്നല് ലഭിച്ചത് കോയമ്പത്തൂരില് നിന്നാണ്. ഇവിടം കേന്ദ്രീകരിച്ചാണ് പൊലീസ് അന്വേഷണം നടത്തിയത്. ഇതിനിടെയാണ് കാഞ്ഞങ്ങാട്ടെ ലോഡ്ജില് അരുണിനെ മരിച്ചനിലയില് കണ്ടെത്തിയത്.
ആതിരയുടെ മുന് സുഹൃത്താണ് അരുണ്. ഇയാളുമായുള്ള സൗഹൃദം രണ്ടുവര്ഷം മുന്പു പെണ്കുട്ടി ഉപേക്ഷിച്ചിരുന്നതായി ബന്ധുക്കള് പറയുന്നു. കഴിഞ്ഞ ദിവസം ആതിരയുടെ വിവാഹം ഉറപ്പിക്കാന് വീട്ടുകാര് തീരുമാനിച്ചു. ഇതറിഞ്ഞ അരുണ് ഇരുവരും ഒരുമിച്ചുള്ള ഫോട്ടോകളും ചാറ്റുകളും ഫെയ്സ്ബുക്കില് ഷെയര് ചെയ്തു. ഇതോടെ വിവാഹനിശ്ചയത്തില് നിന്നു വരന്റെ വീട്ടുകാര് പിന്മാറിയതായും പറയുന്നു.
